आप्रवासनमा ट्रम्प कडा बन्दै टम होमनलाई जिम्मा दिने

पेन्सिल्भेनिया । अमेरिकी नव निर्वाचित राष्ट्रपति डोनाल्ड ट्रम्पले आफ्नो प्रशासनको नयाँ कार्यकालका लागि पूर्व अमेरिकी आप्रवासन तथा भन्सार प्रवर्तन (आईसीई) प्रमुख टम होमनलाई “बोर्डर जार” को रूपमा नियुक्त गर्ने घोषणा गरेका छन्।

ट्रम्पले यो सूचना आफ्नो सामाजिक मिडिया प्लेटफर्म, ट्रुथ सोसल मार्फत सार्वजनिक गर्दै होमनको क्षमतामा पूर्ण विश्वास रहेको बताए। उनले भने, “म तपाईहरूलाई सूचित गर्न पाउँदा खुशी छु कि आईसीईका पूर्व निर्देशक र सिमाना सुरक्षाका लागि स्थिर खम्बा टम होमनले हाम्रो राष्ट्रको सिमाना सुरक्षामा नेतृत्व गर्नेछन्।”

यो भूमिकामा, होमनले उत्तर र दक्षिण दुवै सिमाना व्यवस्थापन गर्ने छन्, साथै समुद्री र हवाई सुरक्षामा पनि ध्यान दिनेछन्। ट्रम्पले होमनले अवैध रूपमा देश प्रवेश गरेका व्यक्तिहरूलाई स्वदेश फिर्ता गर्ने उपायहरू लिनुपर्ने जिम्मेवारी पाउने छन् । जसले ट्रम्पको आप्रवासन नीतिमा महत्त्वपूर्ण अर्थ राख्छ। ट्रम्पले होमनको क्षमतामा कुनै शंका नरहेको र उनले प्रशासनको लक्ष पूरा गर्न सक्षम हुनेमा विश्वास व्यक्त गरे। यो पदलाई सीनेटको अनुमोदन आवश्यक नपर्ने भएकाले यसले प्रत्यर्पण रणनीतिमा महत्त्वपूर्ण भूमिका खेल्ने अपेक्षा गरिएको छ।

ट्रम्पको घोषणा पछि, आईसीईका पूर्व कार्यकारी निर्देशक होमनले फक्स न्यूज च्यानलको “सन्डे मर्निङ फ्यूचर्स” कार्यक्रममा आफ्नो दृष्टिकोण स्पष्ट पारेका छन्।

उनले आईसीईको नेतृत्वमा निर्णयहरू व्यवस्थित र मानवीय हुने आश्वासन दिए। होमनले बताए कि आईसीईले लक्षित अपरेशनहरूलाई प्रभावकारी र निष्पक्ष रूपमा कार्यान्वयन गर्न आवश्यक अनुभव र क्षमता राख्छ। “यो योजनाबद्ध अपरेशन हुने छ,” उनले भने। होमनले आईसीईका कर्मचारीहरूको सीप र अनुभवको प्रशंसा गर्दै अव्यवस्थित क्रियाकलापको जोखिम कम गर्न प्रयास गरिने बताए।

होमनले ट्रम्पको नयाँ कार्यकालमा अमेरिकाको इतिहासकै सबैभन्दा ठूलो प्रत्यर्पण अपरेशनको नेतृत्व गर्ने वाचा गरेका छन्। यस वर्षको राष्ट्रिय सम्मेलनमा, होमनले मिडियामा प्रत्यर्पण प्रयासहरूलाई चित्रण गरिने तरिका प्रति असन्तुष्टि व्यक्त गरेका थिए।