नेपालगन्ज। दशौं धारा नेपालगन्ज म्याराथनको पूर्वसन्ध्यामा हुने नेपालगन्ज कनक्लेवमा नेपाल युवा उद्यमी मञ्च नेपालगन्ज च्याप्टरले महत्वपूर्ण साझेदारी गर्ने भएको छ।

धारा नेपालगञ्ज म्याराथनको १०औं संस्करणलाई उत्सवमय बनाउन ‘दशौंमा दश इभेन्ट’ अन्तर्गत हुने नेपालगन्ज कनक्लेव हरेक वर्ष संयुक्त रूपमा गर्ने सम्बन्धमा नेपालगन्ज म्याराथनका संस्थापक अध्यक्ष टीएस ठकुरी र नेपाल युवा उद्यमी मञ्च नेपालगन्ज च्याप्टरका अध्यक्ष तीर्थ थापाले सम्झौता पत्रमा हस्ताक्षर गरेका छन्।

सम्झौतापछि मञ्चका अध्यक्ष थापाले देशकै प्रतिष्ठित धारा नेपालगन्ज म्याराथन र यसको भगिनी इभेन्ट नेपालगन्ज कनक्लेवमा साझेदारी गर्न पाउँदा सम्पूर्ण युवा उद्यमीलाई उत्साहित बनाउने बताए। उनले भने, “प्रायोजक खोज्नेदेखि खर्च व्यवस्थापनमा हाम्रो समान जिम्मेवारी हुनेछ। देश र समाजप्रति युवा उद्यमीको जिम्मेवारीबोध गराउन, केही सिक्न सिकाउन प्लेटफर्म विकास गर्न कनक्लेव सफल पार्ने भारी हामीले पनि बोकेका छौं।”

सम्झौता हस्ताक्षर कार्यक्रममा नेपालगन्ज म्याराथनका संस्थापक टीएस ठकुरीले समाजलाई दिशानिर्देश गर्ने कार्यक्रममा युवा उद्यमीसँग हातेमालो गर्न पाउँदा बेग्लै ऊर्जा मिलेको बताए। उनले भने, “हाम्रो गाउँ, हाम्रो ठाउँ बनाउने हामीले नै हो, देश बनाउने हामीले नै हो। साझेदारी र सहकार्य संस्कारले नै देश विकास र समृद्धिको बाटोमा जान्छ।”

मञ्चका निवर्तमान अध्यक्ष एवं नेपालगन्ज मेडिकल कलेजका निर्देशक डा. नितेश कनोडियाले नेपालगन्ज कनक्लेव जस्तो ज्ञानवर्धक कार्यक्रमसँग आफू नेतृत्वमा रहँदा साझेदारी सुरुवात गरे पनि वर्तमान नेतृत्वले निरन्तरता दिएकोमा खुशी व्यक्त गरे। उनले भने, “अब हरेक नेतृत्वले यस कार्यक्रमसँग साझेदारी गरे अघि बढ्नेमा विश्वस्त छु। यद्यपी यसको समग्र नेतृत्व नेपालगन्ज म्याराथनले नै लिनुपर्छ।”

मञ्चका वरिष्ठ उपाध्यक्ष डा. ओम मिश्रले कनक्लेव निरन्तरता र प्रभावकारी हुनेमा आफू विश्वस्त रहेको बताए। सम्झौता हस्ताक्षर कार्यक्रममा मञ्चका अर्का उपाध्यक्ष इन्जिनियर अरसद सिद्धिकी, नेपालगन्ज म्याराथनका आउटरिच म्यानेजर चाहना शाह र आइटी कन्सल्ट्यान्ट भानु रेग्मीको उपस्थिति थियो।

नेपालगन्ज म्याराथनको आयोजक क्रियटिभ ह्याण्ड्सले कनक्लेवका डाइरेक्टर तथा मञ्चले डेपुटी डाइरेक्टर नियुक्त गर्नेछ। चाँडै पत्रकार भेटघाटमार्फत कनक्लेवका बारेमा विस्तृत जानकारी गराइने सहमति भएको छ।

नेपालगन्ज कनक्लेव आगामी मंसिर २० र २१ गते हुनेछ र यसमा विभिन्न आठ सेसनमा बहस र छलफल हुने बताइएको छ। क्रियटिभ ह्याण्ड्सको आयोजना र क्रियटिभ गन्ज मिडिया एण्ड इभेन्ट म्यानेजमेन्टको व्यवस्थापनमा हुने दशौं धारा नेपालगन्ज म्याराथनले एम्सको प्रमाणीकरण रुटमार्फत नेपालगन्जलाई उदीयमान सहर कोहलपुरसँग जोड्ने कार्य गर्दै आएको छ।