गोलीकाण्डपछि अमेरिकामा राष्ट्रपतिको सपथ ग्रहण हवाईजहाजमा गरिएको त्यो घटना
पेन्सिल्भेनिया । अमेरिकी राष्ट्रपति पदका उम्मेदवार र रिपब्लिकन पार्टीका उम्मेदवार डोनाल्ड ट्रम्पलाई एक र्यालीका क्रममा शनिबार गोली प्रहार गरिएको थियो । चुनावी भाषण गरीरहेका बेला चलेको गोली उनको दाहिने कान भएर गएको थियो । यो घटनामा एक दर्शकको मृत्यु भएको छ । अमेरिकी सेक्रेट सर्भिसका एजेन्टहरूले जवाफी गोली चलाउँदा ट्रम्पमाथि गोली प्रहार गर्ने व्यक्तिको घटनास्थलमै मृत्यु भएको हो।
अमेरिकाको राष्ट्रपति पदको इतिहास निकै रक्तपातपूर्ण रहेको छ । १९ औं शताब्दीदेखि कार्यालयमा रहँदा कम्तिमा चार राष्ट्रपतिको हत्या भएको छ। यसमा १८६५ मा १६ औं राष्ट्रपति अब्राहम लिंकन र १९६३ मा ३५ औं अमेरिकी राष्ट्रपति जोन एफ केनेडी समावेश छन्।
यसबाहेक सन् १८८१ मा २०औं अमेरिकी राष्ट्रपति जेम्स गारफिल्डको हत्या भएको थियो । राष्ट्रपति बनेको छ महिनापछि उनी न्यू इङ्गल्याण्ड सर्दै थिए। गारफिल्डलाई वाशिंगटनको एक रेल स्टेसनमा चार्ल्स गुइटाउ नामका व्यक्तिले गोली हानेका थिए।
६१ वर्षअघि भएको गोलीकाण्ड अनुसार अमेरिकी राष्ट्रपतिले आपतकालीन अवस्थाका कारण हवाईजहाजमा सपथ लिनुपरेको थियो । यो घटना २२ नोभेम्बर १९६३ मा भएको थियो, जब ३५ औं राष्ट्रपति जोन एफ केनेडीलाई डलास भ्रमणको क्रममा गोली हानी मारिएका थिए । उनी प्रथम महिला र पत्नी ज्याकलिन केनेडीसँग डलासको डाउनटाउन डिले प्लाजामा भेट्न आएका थिए।
केनेडीलाई एक स्नाइपरले गोली हानेको थियो, र त्यसको लगत्तै, केनेडीलाई पार्कल्याण्ड मेमोरियल अस्पताल लगियो, जहाँ पुग्दा केही समयपछि उनलाई मृत घोषित गरियो। त्यसपछि, आपतकालिन समयमा, उपराष्ट्रपति लिन्डन बी. जोन्सनलाई एयर फोर्स वन भित्रको सम्मेलन कक्षमा पदको सपथ ग्रहण गरियो। राष्ट्रपतिले हवाईजहाजमा सपथ लिएको यो अहिलेसम्मको एक मात्र उदाहरण हो ।
लिन्डन बी जोन्सन टेक्सासका बासिन्दा थिए र उनको जन्म एक साधारण किसान परिवारमा भएको थियो। उनको विकिपीडिया प्रोफाइलले देखाउँछ कि १९३० मा स्नातक पछि, उनले केहि समयको लागि शिक्षकको रूपमा काम गरे। सन् १९३२ मा राजनीतिमा प्रवेश गरेपछि उनी १९३७ देखि १९४८ सम्म कंग्रेस सदस्य रहे ।
दोस्रो विश्वयुद्धको दौडान उनले अमेरिकी नौसेनामा लेफ्टिनेन्ट कमाण्डरको पद पनि सम्हालेका थिए। आफ्नो योग्यताका कारण उनी डेमोक्रेटिक पार्टीको नेता चुनिए र सन् १९६० मा केनेडीसँग उपराष्ट्रपतिको चुनाव जितेका थिए। सन् १९६१ मा उनले जर्मनी, भारत र दक्षिण पूर्व एसियाको भ्रमण गरे। केनेडीको मृत्यु पछि, उनी २२ नोभेम्बर १९६३ मा राष्ट्रपति पदमा नियुक्त भए।
केनेडीलाई गोली हानेका व्यक्ति ली हार्वे ओसवाल्ड थिए, जसलाई गोली हानिएको केही समयपछि पक्राउ गरिएको थियो। उनी एक समुद्री सैनिक थिए जो टेक्सासका थिए। यद्यपि, दुई दिन पछि, ओसवाल्डलाई प्रहरी मुख्यालयबाट काउन्टी जेलमा स्थानान्तरण गरिँदै गर्दा, डलास नाइटक्लबका मालिक ज्याक रुबीले उनलाई गोली हानेर मारेका थिए ।
