नेपालले जित्यो मलेसियाविरुद्धको महिला टि २० सिरिज

नेपाली राष्ट्रिय महिला क्रिकेट टिमले आज (आइतबार) मलेसियाविरुद्ध सिरिज ३-२ ले जितेको छ । निर्णायक तथा पाँचौं खेलमा नेपाल ३ विकेटले विजयी भएको हो ।

हिजो (शनिबार) भएको खेलमा ४ विकेटले पराजित भएपछि नेपाल एक खेलअगावै च्याम्पियन बन्ने अवसरबाट चुकेको थियो ।

एक वर्षपछि अन्तर्राष्ट्रिय प्रतियोगितामा सहभागिता जनाएको नेपालले पाँच खेलको टी-ट्वान्टी सिरिज आफ्नो पोल्टामा पारेको हो ।

मलेसियाले दिएको ११० रनको लक्ष्य १९.२ ओभरमा सात विकेट गुमाउँदै भेट्टाएको हो । नेपालले १९.२ ओभरमा सात विकेटको क्षतिमा ११४ रन बनाएको थियो ।

नेपालका लागि सिता राना मगरले सर्वाधिक ३४ रन बनाउँदा कप्तान रुबिना क्षेत्रीले २३ रनको योगदान गरिन् । त्यस्तै अप्सरी बेगम १५ तथा ज्योति पाण्डे १० रनमा अविजित रहँदा अन्य खेलाडीले दोहोरो अंकको रन बनाउन सकेनन् । 

मलेसियाका लागि एैना हाासिमले दुई तथा माहिरा इज्जाति, विनिफ्रेड दुराईसिंगम, अइसा इलिसा र नुर डानिया सुईहाडाले एक एक विकेट लिए ।