डीटी फेस्ट २०२६ : भेन्डर र स्पोन्सरका लागि सिटहरू तीव्र रूपमा भरिँदै
भर्जिनिया / अमेरिकाको सबैभन्दा ठूलो नेपाली सांस्कृतिक उत्सवमध्ये एक मानिने डीटी फेस्ट २०२६ मा सहभागी हुन चाहने भेन्डर र स्पोन्सरहरूका लागि आवेदन खुला गरिएको छ।
आयोजकहरूले भेन्डर तथा प्रायोजनका सिटहरू तीव्र गतिमा भरिँदै गएको जानकारी दिँदै इच्छुक व्यवसायी, उद्यमी र संस्थाहरूलाई समयमै आफ्नो स्थान सुरक्षित गर्न आग्रह गरेका छन्।
हरेक वर्ष हजारौँ सहभागीहरूको उपस्थिति रहने यस उत्सवलाई आफ्नो व्यवसाय, उत्पादन तथा सेवाको प्रवर्द्धन गर्ने उत्कृष्ट अवसरका रूपमा लिइएको छ। त्यसैले आयोजकहरूले ढिलो नगरी आवेदन प्रक्रिया पूरा गर्न अनुरोध गरेका छन्।
आयोजकका अनुसार भेन्डर बुथका लागि विभिन्न शुल्क निर्धारण गरिएको छ। मोमो बिक्री गर्ने भेन्डरका लागि २ हजार अमेरिकी डलर, अन्य खाद्य भेन्डरका लागि १ हजार अमेरिकी डलर, सामान्य व्यापारिक भेन्डरका लागि ५ सय अमेरिकी डलर तथा गैरनाफामूलक संस्थाका लागि ३ सय अमेरिकी डलर शुल्क तोकिएको छ।
बुकिङ सुनिश्चित गर्न आवेदन दिँदा कुल शुल्कको ५० प्रतिशत रकम अग्रिम (डिपोजिट) बुझाउनुपर्ने व्यवस्था गरिएको छ। भेन्डर प्याकेजअन्तर्गत फेस्टिभल-डे डाइरेक्टरीमा नाम समावेश गरिने, रातभर सामग्री सुरक्षित राख्ने (ओभरनाइट लकअप) सुविधा तथा सामान भित्र्याउने निश्चित समय (लोड-इन विन्डो) उपलब्ध गराइने आयोजकले जनाएको छ। साथै, व्यवसाय तथा संस्थाको थप प्रचारप्रसारका लागि चारवटा फरक स्तरका स्पोन्सरशिप प्याकेज पनि उपलब्ध छन्।
भेन्डरहरूका लागि केही महत्त्वपूर्ण नियमसमेत तोकिएका छन्। आवश्यक परे विद्युत् जडान, बत्ती, टेबल कपडा तथा ठूलो आकारको बुथ जस्ता अतिरिक्त सुविधाहरू छुट्टै शुल्क तिरेर लिन सकिने भए पनि आयोजकहरूले सम्भव भएसम्म आफ्नै उपकरण प्रयोग गर्न प्रोत्साहन गरेका छन्।
खाद्य सामग्री बिक्री गर्ने भेन्डरहरूले कार्यक्रम हुनुभन्दा कम्तीमा एक महिना अगाडि लाउडन काउन्टीबाट अस्थायी अनुमति (टेम्पोररी परमिट) प्राप्त गर्नुपर्नेछ। साथै, उनीहरू कार्यक्रमस्थलमा बिहान ९ बजेसम्म अनिवार्य रूपमा पुगिसक्नुपर्नेछ भने बिहान ११ बजेपछि कार्यक्रमस्थलभित्र सवारी साधन सञ्चालन गर्न पाइने छैन।
आयोजकहरूले इच्छुक भेन्डर, व्यवसायी तथा स्पोन्सरहरूलाई आधिकारिक पोर्टलमार्फत समयमै आवेदन दिएर आफ्नो सहभागिता सुनिश्चित गर्न आग्रह गरेका छन्। समयमै दर्ता गर्न सके यस ऐतिहासिक नेपाली सांस्कृतिक उत्सवमा आफ्नो व्यवसाय र ब्रान्डलाई हजारौँ दर्शकमाझ प्रभावकारी रूपमा प्रस्तुत गर्ने अवसर प्राप्त हुने आयोजकको विश्वास छ।
