आईआरएसद्वारा २०२७ का लागि इनकम ट्याक्स ब्राकेट सार्वजनिक
ल्यानक्यास्टर, पेन्सिल्भेनिया / अमेरिकी आन्तरिक राजस्व सेवा (आईआरएस) ले सन् २०२७ का लागि फेडरल इनकम ट्याक्स ब्राकेट सार्वजनिक गरेको छ। मुद्रास्फीतिका आधारमा आयकरका सीमाहरू समायोजन गर्दै आईआरएसले करदाताले कर तिर्नुपर्ने आयको सीमा बढाएको हो।
नयाँ व्यवस्थाअनुसार सन् २०२७ मा करदाताको आम्दानीअनुसार १० प्रतिशतदेखि ३७ प्रतिशतसम्म संघीय आयकर दर कायम हुनेछ। यससँगै अधिकांश करदाताले प्रयोग गर्ने स्ट्यान्डर्ड डिडक्सनको रकम पनि बढाइएको छ।
सन् २०२७ का नयाँ आयकर दर
आईआरएसले सार्वजनिक गरेको नयाँ दरअनुसार एकल कर विवरण बुझाउने र संयुक्त रूपमा कर विवरण बुझाउने विवाहित दम्पतीका लागि आयको सीमा फरक हुनेछ।
| कर दर | एकल करदाता | विवाहित दम्पती (संयुक्त विवरण) |
|---|---|---|
| १० प्रतिशत | $१२,८०० सम्म | $२५,६०० सम्म |
| १२ प्रतिशत | $१२,८०० भन्दा बढी | $२५,६०० भन्दा बढी |
| २२ प्रतिशत | $५२,०२५ भन्दा बढी | $१०४,०५० भन्दा बढी |
| २४ प्रतिशत | $१०९,१२५ भन्दा बढी | $२१८,२५० भन्दा बढी |
| ३२ प्रतिशत | $२०८,३२५ भन्दा बढी | $४१६,६५० भन्दा बढी |
| ३५ प्रतिशत | $२६४,५५० भन्दा बढी | $५२९,१०० भन्दा बढी |
| ३७ प्रतिशत | $६६१,३७५ भन्दा बढी | $७९३,६५० भन्दा बढी |
यी सीमाहरू करयोग्य आम्दानी (ट्याक्सेबल इन्कम) का आधारमा लागू हुन्छन्। करका दरहरू भने सन् २०२६ कै कायम राखिएका छन्। परिवर्तन मुख्यतः मुद्रास्फीतिअनुसार आम्दानीको सीमा बढाइएको हो।
अमेरिकामा सीमान्त कर प्रणाली (मार्जिनल ट्याक्स सिस्टम) लागू हुन्छ। उदाहरणका लागि, एकल करदाताको करयोग्य आम्दानी ६० हजार डलर छ भने पहिलो १२ हजार ८०० डलरमा १० प्रतिशत, त्यसपछिको ३९ हजार २२५ डलरमा १२ प्रतिशत र ५२ हजार २५ डलरभन्दा माथिको बाँकी ७ हजार ९७५ डलरमा २२ प्रतिशत कर लाग्छ। यसरी आम्दानीको फरक हिस्सामा फरक दर लागू हुन्छ।
स्ट्यान्डर्ड डिडक्सनमा वृद्धि
करदाताले आफ्नो करयोग्य आम्दानी घटाउन प्रयोग गर्ने स्ट्यान्डर्ड डिडक्सनको रकम पनि बढाइएको छ। आईआरएसका अनुसार करदातामध्ये करिब ९० प्रतिशतले यही सुविधा प्रयोग गर्छन्।
सन् २०२७ का लागि नयाँ रकम यस्तो छः
- विवाहित दम्पती (संयुक्त कर विवरण): ३३ हजार २०० डलर, सन् २०२६ भन्दा १ हजार डलर बढी।
- एकल करदाता: १६ हजार ६०० डलर, ५०० डलर बढी।
- विवाहित तर छुट्टाछुट्टै कर विवरण बुझाउने: १६ हजार ६०० डलर।
- घरमूली (हेड अफ हाउसहोल्ड): २४ हजार ९२५ डलर।
यसको अर्थ एकल करदाताले १६ हजार ६०० डलर र संयुक्त विवरण बुझाउने दम्पतीले ३३ हजार २०० डलरसम्मको आम्दानीमा स्ट्यान्डर्ड डिडक्सन दाबी गरी करयोग्य आम्दानी घटाउन सक्नेछन्।
बालबालिकासम्बन्धी कर छुट पनि बढ्यो
बालबालिकाका अभिभावकले पाउने चाइल्ड ट्याक्स क्रेडिट पनि बढाइएको छ।
- प्रति योग्य बालबालिका अधिकतम कर छुट २ हजार ३०० डलर हुनेछ। यो सन् २०२६ भन्दा १०० डलर बढी हो।
- यसमध्ये फिर्ता लिन मिल्ने रकम (रिफन्डेबल क्रेडिट) अधिकतम १ हजार ८०० डलर हुनेछ। यो पनि अघिल्लो वर्षभन्दा १०० डलर बढी हो।
उपहार दिँदा कर नलाग्ने सीमा बढ्यो
आईआरएसले वार्षिक उपहार कर छुट (एनुअल गिफ्ट ट्याक्स एक्सक्लुजन) को सीमा पनि बढाएको छ। सन् २०२७ मा एक व्यक्तिलाई एक वर्षमा २० हजार डलरसम्म उपहार दिँदा त्यसलाई करयोग्य उपहारमा गणना गर्नुपर्ने छैन। सन् २०२६ मा यो सीमा १९ हजार डलर थियो।
यो सीमा प्रत्येक व्यक्तिलाई दिइने उपहारका लागि हो।
कहिलेदेखि लागू हुन्छ?
आईआरएसले नोभेम्बर ५ मा सार्वजनिक गरेको नयाँ व्यवस्था सन् २०२७ को कर वर्षका लागि हो। अर्थात् सन् २०२७ जनवरी १ देखि डिसेम्बर ३१ सम्म आर्जन गरेको आम्दानीमा यी नयाँ सीमा लागू हुनेछन्। त्यसको कर विवरण भने सामान्यतया सन् २०२८ मा बुझाउनुपर्नेछ।
यस वर्ष अर्थात् सन् २०२६ मा कमाएको आम्दानीको कर विवरण बुझाउँदा भने सन् २०२६ कै कर दर र कटौतीको सीमा लागू हुनेछ।
मुद्रास्फीतिका कारण आम्दानी बढे पनि करदातालाई स्वतः माथिल्लो करको तहमा पुग्नबाट जोगाउन आईआरएसले हरेक वर्ष करको सीमा समायोजन गर्दै आएको छ। यसपटक पनि करका प्रतिशत नबढाई आम्दानीको सीमा बढाइएको हो।
