ट्रम्पको विजय र अमेरिकी राजनीति बदलिएको परिदृश्य

पेन्सिल्भेनिया । अमेरिकी राष्ट्रपति निर्वाचन २०२४ मा डोनाल्ड ट्रम्पको पुन: विजयले अमेरिकी राजनीतिको नयाँ अध्यायको शुरुवात गरेको छ। यस निर्वाचनले अमेरिकामा वर्ग, जातीयता र समाजको विभाजनलाई झल्काउँछ, जसले देशको राजनीतिक र सामाजिक परिवेशलाई व्यापक रूपमा प्रभावित गरेको छ।

ट्रम्प समर्थक क्यानेथ स्टेवार्ट, जो शिकागोका अफ्रिकी अमेरिकी हुन्, फ्लोरिडाको वेस्ट पाल्म बीचमा आयोजित चुनावी विजय उत्सवमा सहभागी थिए। स्टेवार्टले ट्रम्पको नेतृत्व र ऊर्जा, रस्ट बेल्ट क्षेत्रका कामदार वर्गलाई लक्षित गरी बोलेका कुराहरूको प्रशंसा गर्दै भने, “उहाँले अटो उद्योग, निर्माण क्षेत्रजस्ता मुद्दाहरूमा बोल्नुहुन्छ। ती सबै विषयहरू हुन्, जुन हामीजस्ता कामदारहरूले महत्त्वपूर्ण मान्छौँ।”

ट्रम्पको यो विजय कोरोनाभाइरस महामारीको असरपछि अमेरिकामा व्यापक असन्तोषको संकेतको रूपमा आएको हो। महामारीपछि उत्पन्न महङ्गाई, घरको उच्च मूल्य र आम मानिसको आर्थिक कठिनाइहरूले धेरैलाई असहाय बनायो। धेरैले अमेरिकन ड्रीम टाढिएको महसुस गरे र यस्तो अवस्थामा ट्रम्पको लोकप्रियतामा वृद्धि भयो। ट्रम्पले आफ्ना समर्थकहरूमाझ ‘कार्यकारी वर्ग’ को विरोध गर्दै आफूलाई कामदार वर्गको प्रतिनिधिको रूपमा प्रस्तुत गरे।

निर्वाचनको नतिजाले विभिन्न वर्गका जनताको मनोविज्ञानलाई झल्काउँछ। अमेरिकामा अहिले वर्गीय विभाजन अत्यन्त प्रबल रहेको छ। एउटा अध्ययन अनुसार, ट्रम्पले ग्रामीण क्षेत्रमा उल्लेखनीय समर्थन पाएका छन् भने डेमोक्रेटिक पार्टी प्रमुख शहरहरूमा केन्द्रित रहेको छ। यो विभाजन अमेरिकामा सामाजिक र आर्थिक विभाजनको स्पष्ट संकेत हो।

यस पटक ट्रम्पले अफ्रिकी अमेरिकी, ल्याटिनो तथा अन्य जातीय समुदायमा पनि उल्लेखनीय समर्थन हासिल गरेका छन्। एक सर्वेक्षण अनुसार, ट्रम्पले मध्यम आम्दानी हुने, खासगरी कामदार वर्गका मतदाताहरूको मत ठूलो मात्रामा पाएका छन्। यसले अमेरिकी राजनीतिक परिदृश्यमा वर्गीय मुद्दाको महत्त्व बढ्दै गएको संकेत गर्दछ। ह्वाइट हाउसका पूर्व सल्लाहकार बिल गाल्स्टनले भनेका छन्, “हामी जातीय भन्दा पनि वर्गीय मुद्दाहरूलाई प्राथमिकता दिने दिशामा अघि बढिरहेका छौँ।”

यसबीच, डेमोक्रेटिक पार्टीले वर्गीय विभाजनलाई सम्बोधन गर्न नसकेको आलोचना समेत गरिएको छ। अमेरिकामा लोकप्रिय प्रगतिशील नेता बर्नी स्यान्डर्सले पार्टीले मध्यम वर्गको समर्थन गुमाएको बताएका छन्। उनले भने, “पहिले हामीले गोरा श्रमिक वर्गलाई गुमायौं, अहिले ल्याटिनो र अफ्रिकी अमेरिकी श्रमिक वर्गको समर्थन पनि गुमाइरहेका छौँ।”

यस निर्वाचनले डेमोक्रेटिक पार्टीलाई आफ्ना रणनीतिहरूमा पुनर्विचार गर्न प्रेरित गरेको छ। यस पटक डेमोक्रेटिक उम्मेदवार कमला ह्यारिसले आर्थिक मुद्दाहरूलाई प्राथमिकता दिन नसकेको आरोप पनि लागेको छ। प्रगतिशील समूह ‘अवर रिभोल्युसन’ का कार्यकारी निर्देशक जोसेफ गीभार्घिसले भनेका छन्, “कमला ह्यारिसले जनताको आर्थिक समस्याहरूलाई पर्याप्त रूपमा सम्बोधन गर्न सकिनन्। उनीले प्रजातन्त्र र प्रजनन अधिकारका मुद्दामा ध्यान दिए तर आर्थिक चुनौतीहरूलाई प्राथमिकता दिइनन्।”

यस पटकको निर्वाचनले अमेरिकी राजनीतिमा वर्गीय र आर्थिक विभाजनलाई अझ स्पष्ट बनाएको छ। ट्रम्पको विजयले अमेरिकी राजनीतिमा नयाँ प्रश्नहरू उठाएको छ— के रिपब्लिकन पार्टीले अमेरिकी कामदार वर्गको पक्षमा आफूलाई पुन: स्थापित गर्न सफल भएको हो? र डेमोक्रेटिक पार्टीले आफ्नो पुरानो ‘कामदार वर्गको पार्टी’ छवि पुनःस्थापित गर्न के गर्छ?

अमेरिकी राजनीति अब नयाँ मोडतिर जाँदैछ, जहाँ वर्गीय मुद्दाहरू अझ बढी प्रभावकारी बन्ने देखिन्छ। दी गार्जिएनबाट भावानुवाद