अमेरिकाको एयरपोर्टमा व्हीलचेयरबाट १२ किलो कोकेन बरामद
ह्युस्टन, टेक्सस/ अमेरिकी भन्सार र सीमा सुरक्षा (सीबीपी ) ह्युस्टनका अधिकारीहरूले बुधवार जर्ज बुश इन्टरकन्टिनेन्टल एयरपोर्ट (आइएएच) मा मोटर चालित व्हीलचेयरको डिब्बामा लुकाइएको १२.१६ किलोग्राम कोकेन बरामद गरेको जनाएको छ।
सेप्टेम्बरको अन्त्यमा सीबीपी अधिकारीहरूले एक्स-रे परीक्षणको क्रममा ठुलो मात्रामा लागू औषध तस्करी प्रयास पत्ता लगाएको विज्ञप्तिमा उल्लेख छ।
एक्स-रेले पछाडिको सिटको कुसन भित्र लुकाइएको ११ प्याकेजहरू भएको धातुको डिब्बा पत्ता लगाएको थियो। त्यस पछि अधिकारीहरूले थप जाँच गर्दा कोकेन भेटेका हुन्।
“सीबीपी हाम्रो सिमानाको रक्षा गर्न र अमेरिकीहरूलाई सुरक्षित राख्नको लागि हाम्रो प्रयासहरूमा लगनशील रहन्छ,” सीबीपीका कार्यवाहक क्षेत्र पोर्ट निर्देशक कायला गोन्जालेसले भनेका छन्, “कोकेन एक घातक, खतरनाक लागूपदार्थ हो र यी विषको ओसारपसारले हिंसा, मनी लान्ड्रिङ, र हाम्रो सुरक्षा र स्थानीय समुदायलाई खतरामा पार्ने अन्य आपराधिक गतिविधिहरू निम्त्याउँछ।”
डीइए र संयुक्त राज्य भरका अन्य कानुन प्रवर्तनहरूले फेन्टानिलसँग कोकेन मिसाइएका आक्रमणहरू र ओभर डोजका घटनाहरू बढेको देखेका छन्।
आर्थिक वर्ष २०२४ मा, सीबीपीले पोर्ट अफ एन्ट्री ( पीओइ) मा र बिचमा ६० किलोग्राम भन्दा बढी कोकेन जफत गरेको जनाएको छ।
सीबीपीले केसलाई थप अनुसन्धानको लागि होमल्याण्ड सेक्युरिटी इन्भेस्टिगेशन ( एचएसआई) लाई पठाएको जनाएको छ।
