हज कमिटिका अध्यक्ष शमशेर मियाँ नक्कली भुटानी शरणार्थी प्रकरणमा पक्राउ

काठमाडौं । नेपालीलाई नक्कली भुटानी शरणार्थी बनाउने धन्दामा संलग्न मध्येका शमशेर मियाँलाई प्रहरीले पक्राउ गरेको छ । मियाँ हज कमिटिका अध्यक्ष हुन् ।

नक्कली भुटानी शरणार्थी प्रकरणमा उनी संलग्न रहेको प्रहरीको अनुसन्धानले देखाएको छ । बिशेषगरी धन्दामा संलग्नहरुलाई रकम ओसारपसारमा उनको गाडी प्रयोग भएको थियो । उनकै गाडी प्रयोग गरी पूर्व गृहमन्त्री बालकृष्ण खाण, पूर्व गृहसचिव टेकनारायण पाण्डे लगायतका व्यक्तिले रकम ओसारपसार गरेका थिए । उनको गाडीलाई प्रहरीेले नियन्त्रणमा लिएको छ । गाडीलाई अहिले जिल्ला प्रहरी परिसरमा राखिएको छ ।

जिल्ला प्रहरी परिसर काठमाडौंका प्रवक्ता एसपी सिताराम रिजालले मियाँ पक्राउ परेको बताए । उनले भने,‘नक्कली भुटानी शरणार्थी प्रकरणमा शमशेर मियाँ पक्राउ परेका छन् । उनलाई काठमाडौं परिसरबाटै खटिएका प्रहरी टोलीले काठमाडौंबाट पक्राउ गरेको हो ।’

धन्दामा संलग्न भएको अभियोगमा प्रहरीले खाण र पाण्डेसहित पूर्वउपप्रधानमन्त्री टोपबहादुर रायमाझी, पूर्वगृहमन्त्री रामबहादुर थापा बादलका सल्लाहकार इन्द्रजित राई, पूर्वसांसद आङटावा शेर्पालाई पक्राउ गरिसकेको छ । त्यसबाहेक धन्दामा संलग्न सन्दीप रायमाझी, केशव दुलाल, सानु भण्डारी, टंक गुरुङ, सन्देश शर्मा, सागर थुलुङ, नरेन्द्र केसी, रामशरण केसी र गोविन्द चौधरीलाई पनि पक्राउ गरेको छ । बादलका छोरा प्रतीक थापा र नीरज राईलगायत फरार छन् ।

उनीहरु विरुद्ध संगठित अपराध तथा ठगि मुद्यामा म्याद थप भई अनुसन्धान भइरहेको छ । जिल्ला सरकारी वकिल कार्यालयले उनीहरु विरुद्ध राज्य विरुद्धको अपराधमा समेत मुद्या चलाउन प्रहरीलाई निर्देशन दिएको छ । अबको दुई दिनभित्र प्रहरीले घटनाको अनुसन्धान सकेर प्रतिवेदन सरकारी वकिल कार्यालयमा पेश गर्र्दैछ ।