सूर्य नेपाल च्यालेन्जको पहिलो दिन रबिलाई अग्रता
काठमाडौं । सूर्य नेपाल गल्फ टुर २०२२-२३ अन्तर्गत छैटौं प्रतियोगिता, सूर्य नेपाल च्यालेन्जको पहिलो दिन रबि खड्का शीर्षस्थानमा रहेका छन्। ५-अन्डर ६३ को उत्कृष्ट कार्डमा रबिले दिनेश प्रजापतिलाई एक स्ट्रोकले पछि पारेका छन्।
४-अन्डर ६४ सहित दिनेश प्रजापति दोस्रो स्थानमा छन्। भुवन नगरकोटी र दीपक थापा मगरले २-अन्डर ६६ मा संयुक्तरुपमा तेस्रो स्थान बाँडे। उनीहरू लिडर रबि भन्दा ३ स्ट्रोकले पछि रहेका छन्। १-अन्डर ६७ को स्कोरमा प्रोफेसनल भुवन कुमार रोक्का तथा एमरच्योरद्वय सुबाश तामाङ र सुरेश तामाङ संयुक्तरुपमा पाँचौ स्थानमा छन्।
यसैगरी भेट्रान गल्फर रामे मगरले इभन-पार ६८ सहित आठौं स्थानमा पहिलो १८ होलको खेल सकाएका छन्। १-ओभर ६९ मा प्रोफेसनल खेलाडीहरु धन बहादुर थापा र शिवराम पौडेल तथा एमरच्योरद्वय युवराज भुजेल र सदभाव आचार्यले संयुक्तरुपमा नवौं स्थान बाँडे।
रबिले सानदार सुरुवात गर्ने क्रममा पहिलो होलमा बर्डी प्रहार गरे भने ५-पारको चौथो होलमा इगलको सफलता प्राप्त गर्दै फ्रन्ट नाइन ३-अन्डर ३१ मा सकाए। यसपछि १०औं, १७औं र १८औं होलमा एक-एक सट बचाउँदा १६औं होलको बोगीले ब्याक नाइन २-अन्डर ३२ मा पुरा गरे।
दिनेशले बोगी रहित कार्ड बनाए। चौथो र पाँचौं होलको बर्डीले फ्रन्ट नाइन २-अन्डर ३२ मा पुरा गरे। यसपछि १०औं र १३औं होलमा पनि एक-एक सट बचाउँदै ब्याक नाइन पनि
२-अन्डर ३२ मा सकाए। भुवनले तेस्रो होलको बोगीका विरूद्ध चौंथो र आठौं होलमा बर्डी प्रहार गर्दै ब्याक नाइन १-अन्डर ३३ मा सकाए। यसपछि १०औं र १३औं होलमा बर्डीको सफलता प्राप्त गरे। १७औं होलको बोगीले ब्याक नाइन पनि १-अन्डर ३३ मा पुरा गरे।
दीपकले पनि फ्रन्ट नाइन र ब्याक नाइन दुवै १-अन्डर ३३ मा सकाए। उनले दोश्रो होलमा बर्डी प्रहार गरे र अन्य आठ होलमा पार बचाए। ब्बाक नाईनमा उनले दोस्रो, १२औं र १३औं होलमा एक-एक सट बचाउँदा १५औं होलमा बोगी खेपे।
प्रोफेसनल गल्फर्स एसोसिएसन नेपालद्वारा आयोजित र सुर्य नेपाल प्रालिको प्रायोजनमा जारी ७२ होलको प्रतियोगितामा ३६ होलको समाप्तीमा कट लागु हुनेछ। जहाँ उत्कृष्ट २१ प्रोफेसनल र टाइमा पर्ने खेलाडी तथा कम्तीमा ६ एमेच्योर खेलाडीले अन्तिम ३६ होलको लागि स्थान बनाउनेछन्। प्रतियोगितामा @( प्रोफेसनल र * एमेच्योर गरी कुल ३७ खेलाडीले प्रतिस्पर्धा गरिरहेका छन्।
कुल ५ लाख ४५ हजार नगद पुरस्कार राशीको प्रतियोगिताको विजेताले उपाधिसँगै १ लाख प्राप्त गर्नेछन्। दोस्रो हुनेले ६५ हजार र तेस्रो हुनेले ४६ हजार प्राप्त गर्नेछन्। साथै उत्कृष्ट २१ मा पर्ने व्यवसायिक खेलाडीले पनि नगद पुरस्कार प्राप्त गर्नेछन्।
