नेपाली-अमेरिकी विद्यार्थीहरूका लागि ‘पाथवे टु प्रमिस’ युथ समिट
फेयरफ्याक्स, भर्जिनिया / ग्लोबल फेमिली फाउन्डेशनको प्रस्तुति र थ्रि-इ इन्टरटेनमेन्टको व्यवस्थापनमा युवा सशक्तीकरणका लागि एक विशेष पहलको घोषणा गरिएको छ।
नेपाली विद्यार्थी संघ ( एनएसए) र मुग्लानको बताससँगको सहकार्य तथा स्थानीय समुदायका अगुवाहरूको साथमा “पाथवे टु प्रमिस” करियर एक्सप्लोरेसन एन्ड मेन्टरसिप समिट आयोजना गर्न लागिएको हो।
कार्यक्रम जुन १४ तारिख बिहान १० देखि दिउँसो २ बजे सम्म भर्जिनियाको फेयरफ्याक्स जर्ज मेसन युनिभर्सिटीमा हुने छ ।
नेपाली-अमेरिकी मिडल स्कुल, हाई स्कुल र कलेज जान तयार भएका विद्यार्थी तथा उनीहरूका अभिभावकहरूलाई लक्षित गरी यो कार्यक्रम तयार पारिएको आयोजकको भनाइ छ ।
‘यस पहलको मुख्य उद्देश्य कलेजको तयारी, छात्रवृत्ति र विभिन्न व्यावसायिक क्षेत्रहरूबारे स्पष्ट जानकारी दिँदै विद्यार्थीहरूको शैक्षिक महत्त्वाकाङ्क्षा र व्यावहारिक सफलताबिचको दुरीलाई कम गर्नु हो।’ आयोजकद्वारा प्रेसित विज्ञप्तिमा भनिएको छ, ‘परम्परागत प्रवर्द्धनात्मक भाषण वा लेक्चरभन्दा फरक रहने यो अन्तरक्रियात्मक चार घण्टाको समिटमा विद्यार्थीहरूले प्रत्यक्ष अनुभव र परामर्श पाउनेछन्।’
कार्यक्रममा विज्ञान, प्रविधि, इन्जिनियरिङ, र गणित, स्वास्थ्य सेवा , व्यवसाय, वित्त , कानुन, सरकार, र रचनात्मक कला जस्ता बजारमा उच्च माग भएका १० भन्दा बढी विधाका छुट्टाछुट्टै करियर टेबलहरू राखिनेछन्।
एनएसए र मुग्लानको बतासको वृहत् नेटवर्कको सहयोगमा, सहभागीहरूले सम्बन्धित क्षेत्रका विज्ञहरूसँग भेटघाट गर्ने र हाल कलेज पढ्दै गरेका विद्यार्थीहरूबाट कलेज जीवन तथा पढाइको व्यवस्थापनबारे व्यावहारिक अनुभव सुन्ने मौका पाउनेछन्। यसका साथै, समिटमा वास्तविक करियर मार्गदर्शन र इन्टर्नसिप प्राप्त गर्ने तरिकाहरूबारे जानकारी दिइनुका साथै योग्य विद्यार्थीहरूका लागि उपलब्ध छात्रवृत्तिका अवसरहरू पनि प्रदान गरिनेछ।
मनोरञ्जन (शोबिज) क्षेत्रबाट माथि उठेर सामुदायिक विकासतर्फ केन्द्रित हुँदै आयोजक र सहयोगी संस्थाहरूले आगामी पुस्ताका लागि एउटा दिगो र सहयोगी नेटवर्क निर्माण गर्ने लक्ष्य राखेका छन्।
“थ्रि-इ इन्टरटेनमेन्टमा हामी विश्वास गर्छौँ कि समुदायलाई सशक्त बनाउनु मनोरञ्जनभन्दा धेरै माथिको कुरा हो,” संस्थाले जारी गरेको विज्ञप्तिमा भनिएको छ।
ग्लोबल फेमिली फाउन्डेशन, स्थानीय शिक्षक, मेन्टरहरू र एनएसए तथा मुग्लानको बतास जस्ता प्रतिबद्ध सामुदायिक संस्थाहरूसँगको सहकार्य युवाहरूको उज्ज्वल भविष्यका लागि बलियो मार्गचित्र कोर्न महत्त्वपूर्ण हुने उनीहरूले बताएका छन्।
समग्रमा, यो समिट युवा विद्यार्थीहरूलाई आफ्नो भविष्यको करियरमा सफल हुन आवश्यक पर्ने व्यावहारिक सीप, मार्गदर्शन र आत्मविश्वास प्रदान गर्ने एक सामूहिक प्रयास हो।
