सबैभन्दा उत्कृष्ट आर्थिक व्यवस्था भनेको पुँजीवादी व्यवस्था हो : गगन थापा
काठमाडौँ । नेपाली कांग्रेसका महामन्त्री गगन थापाले अर्थतन्त्रलाई अगाडि बढाउन सबैभन्दा उत्कृष्ट पुँजीवादी व्यवस्था रहेको बताएका छन् ।
शुक्रवार नयाँ वर्ष २०८२ को शुभकामना तथा क्यालेन्डर विमोचन कार्यक्रममा बोल्दै उनले पुँजीवादी आर्थिक व्यवस्था भित्र नाफा हुने भन्दै पुँजीवादी व्यवस्था उत्कृष्ट रहेको बताएका हुन् ।
उनले भने,‘मानव समाजलाई अगाडि बढाउने सन्दर्भमा राजनीतिक प्रणालीका हिसाबले सबैभन्दा उत्कृष्ट प्रणाली लोकतन्त्र प्रणाली हो । अर्थतन्त्रलाई अगाडि बढाउने हिसाबमा सबैभन्दा उत्कृष्ट आर्थिक व्यवस्था भनेको पुँजीवादी आर्थिक व्यवस्था नै हो । त्यो पुँजीवादी आर्थिक व्यवस्था भित्र नाफा हुन्छ । नाफा कसरी कमाउने भन्ने कुरा सबैभन्दा महत्त्वपूर्ण कुरा हो ।’
उनले निजी क्षेत्रलाई प्रोत्साहन गर्नुपर्ने भन्दै निजी क्षेत्रलाई सबैले मद्दत गर्नुपर्ने बताए ।
‘निजी क्षेत्र र बिचौलिया फरक कुरा हो । हामीले निजी क्षेत्रलाई प्रोत्साहन गर्ने, मद्दत गर्ने र बिचौलियाको प्रवृत्तिलाई निरुत्साह गर्ने हो । पुँजीवादी अर्थ व्यवस्था भित्र बिचौलियाको ठाउँ हुँदैन,’ उनले भने ।
