बयानका लागि रविलाई चितवन लगियो
काठमाडौं । सहकारी ठगीको आरोपमा पक्राउ परेका पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेलाई मंगलबार बयानका लागि चितवन लगिएको छ।
चितवनमा सहारा चितवन सहकारी लिमिटेडको रकम हिनामिना गरेको आरोपमा लामिछानेविरुद्ध यही मंसिर ५ गते पूरक जाहेरी दर्ता गरिएको थियो। यसै सन्दर्भमा, उनलाई काठमाडौंबाट चितवन पुर्याइएको हो।
यसअघि, लामिछानेलाई कास्की, रुपन्देही, र काठमाडौंमा लगेर बयान लिइएको थियो। सहकारी ठगी प्रकरणमा पूर्वडीआईजी छविलाल जोशी र रामबहादुर खनाललाई पनि चितवन लगेर बयान गराइएको थियो।
रवि लामिछानेलाई हाल विभिन्न स्थानहरूमा उजुरी परेपछि अनुसन्धानको दायरामा राखिएको छ। चितवनमा जारी बयानले थप प्रमाण जुटाउन र कानूनी प्रक्रियालाई टुंग्याउन सहयोग गर्ने अपेक्षा गरिएको छ।
