पूर्णबहादुरको सारङ्गी पेन्सिल्भेनियाको तीन सहरमा

पेन्सिल्भेनिया । नेपाली चलचित्रमा रेकर्ड ब्रेक गरेको ‘पूर्ण बहादुरको सारङ्गी’ले अमेरिकाका हलहरुमा पनि हाउसफुल भएको छ।

पेन्सिल्भेनियाको तीन ठूला सहरहरुमा पनि प्रदर्शन हुँदैछ । जस अन्तर्गत ह्यारिसवर्गमा १५ तारिख प्रदर्शन हुने छ भने, एरी र पिट्सबर्गमा भने प्रदर्शनमा आइसकेको छ । अमेरिकामा रहेका नेपाली दर्शकहरूले चलचित्रलाई खुबै रुचाएका छन् ।

नेपालमा हाउसफुल व्यापार गर्दै दर्शकहरूबाट अत्यधिक प्रशंसा पाएको यस चलचित्रको विदेशमा पनि बुकिङको माग लगातार बढ्दो छ। अमेरिकामा ‘पूर्ण बहादुरको सारङ्गी’ नोभेम्बर ८ (शुक्रबार) बाट प्रदर्शनमा आएको हो।

चलचित्र हेर्नका लागि मंगलबारदेखि नै बुकिङ खुला गरिएको थियो । जसमा अमेरिकाका टेक्सासको डलास, ह्यूस्टन, अस्टिन, ओहायोको कोलम्बस, सिन्सिनाटी, क्लीभल्याण्ड, बोस्टन, न्यू ह्याम्पशायर, कनेक्टिकट, पेन्सिलभेनिया, शिकागो, क्यालिफोर्नियाको बे एरिया, सियाटल, ओरेगन, डेनभर र फिनिक्सलगायतका प्रमुख सहरहरूमा प्रदर्शन भइरहेको छ। धेरै सहरका हलहरूमा शोहरू पहिले नै बुक भइसकेका छन् ।

आगामी दुई हप्ताका लागि अग्रिम बुकिङ पनि थपिएको छ। निर्माणपक्षका अनुसार अमेरिकामा बसोबास गर्ने नेपाली डायस्पोरा समुदायले यस चलचित्रप्रति उच्च रुचि देखाएका छन्।

यस सफलताले नेपाली डायस्पोराले आफ्नो नेपाली कला, संस्कृति र सिनेमा प्रतिको लगावलाई झल्काउँछ। निर्माता प्याट्रिक सुवेदीले नेपाली चलचित्रको माग विश्वभर नेपाली समुदायमा बढ्दो रहेको बताए।

उनले भने, नेपाली चलचित्रको समर्थन दिन दुई तीन घण्टा ड्राइभ गरेर पनि दर्शक हलमा आउनुहुन्छ। यो क्रेज ‘पूर्ण बहादुरको सारङ्गी’मा पनि देखिनेछ।
चलचित्रको निर्देशन सरोज पौडेलले गरेका हुन् भने विजय बराल,अञ्जना बराइली प्रकाश सपूत, बुद्धि तामाङ, मुकुन भुसाल,लगायतको उत्कृष्ट अभिनय रहेको छ।
यसैगरी चलचित्र ‘कबड्डी ४’को नाममा रहेको धेरै कमाउने सिनेमाको रेकर्ड पनि ‘पूर्ण बहादुरको सारङ्गी’ ले तोडेको छ ।

‘कबड्डी ४’ले लाइफटाइममा बनाएको रेकर्ड ‘पूर्ण बहादुरको सारङ्गी’ले १३ दिनमै तोडेको थियो । दुई वर्षअघि ‘कबड्डी ४’ले २३ करोड ५० लाख कमाउँदै सर्वाधिक कमाई गर्ने नेपाली फिल्मको कीर्तिमान बनाएको थियो । यो आँकडा ‘सारङ्गी’ले १३ दिनमा नै कटाएको छ । फिल्मले मंगलबारसम्म २५ करोडमाथि कमाई गरेको वितरक कम्पनी ब्यांकटेस इन्टरटेनमेन्टको दाबी छ । तर चलचित्र विकास बोर्डले भने बक्स अफिस रिपोर्ट सार्वजनिक गरेको छैन ।