इजरायलद्वारा हिजबुल्लाह प्रमुख नसरल्लाहको हत्या गरेको दाबी

काठमाडौँ । इजरायलले हिजबुल्लाह प्रमुख हसन नसरल्लाह हवाई आक्रमणमा मारिएको दाबी गरेको छ। इजरायल डिफेन्स फोर्स (आइडीएफ) ले हिजबुल्लाहको मुख्यालयमा लक्षित हवाई आक्रमणमा नसरल्लाहको मृत्यु भएको जनाएको हो।

हालसम्म हिजबुल्लाहले नसरल्लाहको मृत्युको औपचारिक पुष्टि गरेको छैन। हसन नसरल्लाह १९९२ देखि इरान समर्थित हिजबुल्लाह संगठनका मुख्य सदस्य थिए र संस्थापक सदस्यहरूमध्ये एक मानिन्छन्। मिडिया रिपोर्टहरू अनुसार, इजरायली आक्रमणमा ध्वस्त भएको कमाण्ड सेन्टरको भग्नावशेषमा नसरल्लाहकी छोरीको शव पनि फेला परेको छ।

इजरायली सेनाले हाल बेरुत र लेबनानका विभिन्न क्षेत्रमा मिसाइल आक्रमणलाई तीव्र पारेको छ। साथै, इजरायलले बेरुतको दहियाह क्षेत्रमा बसोबास गरिरहेका नागरिकहरूलाई सुरक्षित स्थानमा जान आग्रह गरेको छ, आरोप लगाउँदै कि हिजबुल्लाहले यी इलाकाहरू इजरायलमा आक्रमण गर्न प्रयोग गरिरहेको छ।

यसअघि, इजरायलले हिजबुल्लाहका मिसाइल इकाई प्रमुख मोहम्मद अली इस्माइल र उनका सहायक हुसेन अहमद इस्माइलको पनि हत्या भएको दाबी गरेको थियो।