कमला ह्यारिस ७ प्रतिशतले अगाडि, ट्रम्पलाई चुनौती
पेन्सिल्भेनिया । अमेरिकी उपराष्ट्रपति कमला ह्यारिसले रिपब्लिकन उम्मेदवार डोनाल्ड ट्रम्पलाई ७ प्रतिशतले पछि पार्दै राष्ट्रपति निर्वाचनमा अगाडि रहेको नयाँ सर्वेक्षणले देखाएको छ। नोभेम्बर ५ मा हुने अमेरिकी राष्ट्रपतिको चुनावको लागि गरिएको रायसर्वेक्षणमा ह्यारिसले ४७ प्रतिशत समर्थन पाएकी छन् भने ट्रम्पले ४०प्रतिशत समर्थन प्राप्त गरेका छन्।
ह्यारिसको समर्थन ४६.६१प्रतिशत देखिएको छ भने ट्रम्पलाई ४०.४८प्रतिशत समर्थन रहेको तीन दिनसम्म चलेको र विहिबार सकिएको रायसर्वेक्षणले जनाउँछ। यो आंकडा सेप्टेम्बर ११-१२ को रायसर्वेक्षणमा ह्यारिसको ५ प्रतिशतको अग्रतासँग तुलना गर्दा केही उच्च देखिएको छ।
सर्वेक्षणको त्रुटि सीमा चार प्रतिशत रहेको भए पनि राष्ट्रिय सर्वेक्षणहरूले जनताको धारणा देखाउने भए पनि वास्तविक निर्वाचन परिणाम भने इलेक्टोरल कलेजको राज्य-राज्य नतिजाहरूले निर्धारण गर्नेछन्। यसमा सात वटा निर्णायक राज्यहरू निर्णायक हुने सम्भावना छ।
सम्भावित निर्णायक राज्यहरूमा ह्यारिस र ट्रम्पबीच नतिजा निकै प्रतिस्पर्धात्मक देखिएको छ। न्युयोर्क टाइम्स/सिएना कलेजको पछिल्लो सर्वेक्षणले एरिजोना, जर्जिया, र उत्तर क्यारोलिनामा ट्रम्पको सानो अग्रता देखाएको छ।
अर्थतन्त्र, रोजगार र बेरोजगारीमा कसको नीति राम्रो भन्ने प्रश्नमा, ४३प्रतिशत मतदाताहरूले ट्रम्पको नीति चुनेका छन् भने ४१प्रतिशतले ह्यारिसलाई समर्थन गरेका छन्। अगस्टमा गरिएको रायसर्वेक्षणमा ट्रम्पले तीन अंकको अग्रता लिएका थिए भने जुलाईमा ह्यारिसले चुनावी अभियान सुरु गर्दा उनले ११ अंकको अग्रता लिएका थिए।
कमला ह्यारिसले राष्ट्रपति जो बाइडेनले जुन महिनामा ट्रम्पसँगको कमजोर बहसपछि आफ्नो पुनःनिर्वाचन अभियानलाई अन्त्य गरेपछि चुनावी दौडमा प्रवेश गरेकी थिइन्। प्रारम्भिक सर्वेक्षणहरूले ट्रम्पलाई अर्थतन्त्रमा बलियो उम्मेदवारको रूपमा देखाएको थियो, विशेषगरी बाइडेन प्रशासनको अवधिमा उच्च मुद्रास्फीतिपछि।
अर्थतन्त्रलाई नै मुख्य मुद्दा बनाएर दुबै उम्मेदवार चुनावी प्रतिज्ञा गरिरहेका छन्। ट्रम्पले मंगलबार संघीय जमिनमा विशेष निर्माण क्षेत्रहरू सिर्जना गर्ने घोषणा गरेका छन् भने उनले आयातित सामानहरूमा थप कर लगाउने वाचा पनि गरेका छन्।
ह्यारिसले परिवारलाई कर छुट दिने र ठूला कम्पनीहरूमा उच्च कर लगाउने योजना सार्वजनिक गरिसकेकी छन्।
