नेपालले अमेरिकामा क्रिकेट खेल्ने मिति र ठाउँ सार्वजनिक
ल्यानक्यास्टर,पेन्सिल्भेनिया/ आइसिसी विश्वकप लिग-२ अन्तर्गत क्यानडा र ओमानविरुद्धको त्रिकोणात्मक एक दिवसीय सिरिजका लागि अहिले नेपाली राष्ट्रिय क्रिकेट टोली क्यानडामा छ।
क्यानडामा हुने सिरिज सेप्टेम्बर १६ (भदौ ३१ गते) देखि सुरु हुँदै छ। त्यहाँ नेपालले सेप्टेम्बर २४ (असोज ८) सम्म लिग-२ को सिरिज खेल्दै छ। त्यसपछि अक्टोबर २ (असोज १६) गतेसम्म टी-२० सिरिज हुनेछ।
क्यानडामा खेलेपछि नेपाली टोली अमेरिका भ्रमणमा जानेछ। त्यहाँ नेपाल, अमेरिका र स्कटल्यान्डबिच खेल हुनेछ। अमेरिका भ्रमणमा पनि नेपालले लिग-२ को त्रिकोणात्मक सिरिज र टी-२० त्रिकोणात्मक सिरिज गरी दुई सिरिज खेल्नेछ।
लिग-२ को सिरिज अमेरिकाको टेक्सस राज्यको ह्युस्टनको प्रिएरी भ्यूमा हुने तय भएको छ।
सबै खेल अमेरिकाको स्थानीय समयअनुसार बिहान १०:३० र नेपाली समयअनुसार राति सवा १० बजे सुरु हुनेछ। तालिकाअनुसार लिग-२ नेपालले २७ अक्टोबरमा (कात्तिक ११) अमेरिकासँग, २९ अक्टोबरमा (कात्तिक १३) स्कटल्यान्डसँग, २ नोभेम्बरमा (कात्तिक १७) फेरि अमेरिकासँग र अन्तिम खेलमा ४ नोभेम्बरमा (कात्तिक १९) स्कटल्यान्डसँग प्रतिस्पर्धा हुनेछ।
लिग-२ को एक दिवसीय सिरिज पछि तीनै टोलीबिच टी-२० सिरिज हुनेछ।
लिग-२ मा अहिलेसम्म नेपालले पहिलो सिरिजको चार खेल खेलेको छ। जसमा नेपालले एक खेलमा मात्र जित निकालेको छ। गत फेब्रुअरीमा घरेलु मैदानमा नामबिया र नेदरल्यान्ड्सबिरुद्धको चार खेल मध्ये नेपाल तीन खेलमा पराजित भएको थियो।
र यो पनि…
