पति नरेश सँग कुरा गर्नेलाई सम्पर्कमा आउन प्रहरीको निर्देशन
भर्जिनिया,अमेरिका/ अमेरिकाको भर्जिनियाबाट नेपाली नर्स ममता भट्ट काफ्ले बेपत्ता प्रकरणमा छानबिन गरिरहेको प्रहरीले उनका पति नरेश भट्ट सँग घटना भएको समयमा सम्पर्क वा कुराकानी गर्ने जो कोहीलाई पनि सम्पर्कमा आउन भनेको छ।
मनसास पार्क प्रहरी विभागले मंगलवार सार्वजनिक सूचना जारी गर्दै यस्तो निर्देशन दिएको हो। एक वर्षकी आमा ममता जुलाई अन्तिम साता देखि बेपत्ता छिन्।
उनी बेपत्ता भएको तीन साता पछि प्रहरीले पति नरेश भट्टलाई पक्राउ गरेको थियो। नरेश अहिले थुनामा छन्।
अदालतले उनलाई धरौटी दिन अस्वीकार गर्दै आएको छ।
प्रहरीले घटनाको बारेमा अनुसन्धान भइरहेको भन्दै जुलाई २८ देखि अगस्ट ५ बिचमा नरेश भट्टसँग सम्पर्क वा कुरा गर्ने जो कोहीलाई मनसास पार्क प्रहरी विभाग, ७०३-३६१-११३६ मा सम्पर्क गर्न अनुरोध गरेको छ।
प्रहरीले त्यस्ता व्यक्तिको खोजी गरिरहेको पनि जनाएको छ।
