प्रचण्डको अभिव्यक्तिले राजनीतिक तनाव गरायो : महासचिव पोख्रेल
नेकपा एमालेका महासचिव शंकर पोख्रेलले माओवादी केन्द्रका अध्यक्ष पुष्पकमल दाहाल प्रचण्डको अराजनीतिक र असंसदीय अभिव्यक्तिले तनाव सिर्जना गरेको आरोप लगाएका छन्। पोख्रेलले प्रचण्डको अतिक्रमणकारी दृष्टिकोण र श्रीलंका तथा बङ्गलादेशको उदाहरण दिँदै अस्थिरता फैलाउन लागेको उल्लेख गरे।
उनले प्रचण्डको अभिव्यक्ति लोकतान्त्रिक मूल्यमान्यता र संसदीय मर्यादाको विपरीत रहेको बताएका छन्। पोख्रेलले मुलुकमा दुई दलीय प्रणालीको आवश्यकता नभए पनि स्थायित्व र विकासका लागि दुई ठूला दलको उपस्थिति महत्वपूर्ण रहेको बताउँदै कांग्रेस र एमालेले दुई दलीय व्यवस्थाको वकालत नगरेको स्पष्ट पारे।
युवाहरूमा निराशावाद बढिरहेको र त्यसलाई कम गर्न राज्यले रोजगारीको अवसर प्रदान गर्न आवश्यक रहेको उनले जोड दिएका छन्। संविधान सुदृढ गर्नका लागि सबै दललाई समेट्न एमाले सकारात्मक रहेको उनले बताएको छ।
महासचिव पोख्रेलले कांग्रेस महामन्त्रीद्वयको असन्तोष बनावटी भएको र काठमाडौं महानगरपालिकाका मेयर बालेन शाहले सांसद रेखा शर्माको विषयमा उठाएको आरोपको निर्णय अदालत र अन्य निकायमा हुने उल्लेख गरे।
