दक्षिण एसियाली कराते मङ्सिर तेस्रो सातादेखि

काठमाडौं । नेपाल कराते महासङ्घको आयोजनामा सातौँ दक्षिण एसियाली कराते च्याम्पियनसिप मङ्सिर १६ गतेदेखि हुने भएको छ ।

प्रतियोगितामा दक्षिण एसियाका ६ राष्ट्रको सहभागिता रहने शुक्रवार आयोजित पत्रकार सम्मेलनमा नेपाल कराते महासङ्घका अध्यक्ष एवं राष्ट्रिय खेलकुद परिषद् (राखेप) का पूर्व सदस्य–सचिव युवराज लामाले जानकारी गराए । नेपालसहित बङ्गलादेश, भुटान, भारत, पाकिस्तान र श्रीलङ्काले दुई दिने प्रतियोगितामा प्रतिस्पर्धा गर्ने छन् । प्रतिबन्धमा रहेकाले श्रीलङ्काको भने एनओसी टिम सहभागी हुने जनाइएको छ ।

क्याडेट, जुनियर, यु–२१ र सिनियरमा गरी ४ विधामा जम्मा ६२ स्वर्णका लागि प्रतिस्पर्धा हुने कराते महासङ्घका महासचिव दावा गुरुङले जानकारी दिए । क्याडेटमा १२, जुनियरमा १५, यु–२१ मा १६ र सिनियरमा १९ स्पर्धामा खेल हुनेछ ।

जम्मा ३ सय ५३ खेलाडीको सहभागिता रहने जनाइएको छ । सबै स्पर्धामा भाग लिने नेपालबाट ६८ खेलाडीले चुनौती प्रस्तुत गर्ने छन् । नेपाली खेलाडीको प्रशिक्षणका लागि ६ प्रशिक्षक र २ व्यवस्थापकको व्यवस्था गरिएको छ । कुमुते टोली गोकर्णेश्वरस्थित शंखडोल कराते एकेडेमी तथा काता टोली बौद्ध डोजाङमा प्रशिक्षणरत छन् ।

अध्यक्ष लामाले यस प्रकारको प्रतियोगिता २५ वर्षपछि आयोजना गर्न लागेको बताउँदै प्रतियोगिताले करातेको गरिमा अझ बढाउन मद्दत पुग्ने विश्वास व्यक्त गरे ।

लामाले प्राविधिक रूपमा यो प्रतियोगिता बङ्गलादेशले आयोजना गर्नु पर्नेमा बङ्गलादेशले प्रस्ताव नै नगरेकाले नेपालले आयोजनाका लागि प्रस्ताव गरेकोमा एसियाली कराते महासङ्घ (एकेएफ) ले पनि स्वीकृति दिएको जानकारी गराए ।

‘प्राविधिक रूपले यो प्रतियोगिता बङ्गलादेशले गर्नु पर्ने थियो । बङ्गलादेशले प्रस्ताव नै राखेन । हामीले प्रस्ताव राखिम । एकेएफको जोड पनि नेपाललाई नै रह्यो ।’ लामाले भने– ‘प्रतियोगितासँगै हामीले सेमिनार पनि गर्ने सहमति मागिम् । सेमिनारका लागि पनि एकेएफबाट स्वीकृति प्राप्त भयो ।’

एकेएफ र राखेपबाट स्वीकृति पाएको प्रतियोगितालाई विश्व कराते महासङ्घ (डब्लुकेएफ) र नेपाल ओलम्पिक कमिटीले पनि मान्यता दिएको कराते महासङ्घले जनाएको छ ।

प्रतियोगिताका खेलहरू त्रिपुरेश्वरस्थित राखेपको कभर्डहलमा हुनेछ । खेल खेलाउन ३ टाटामी (म्याट) प्रयोग गरिने छ । आयोजकका अनुसार प्रतियोगिता सञ्चालन गर्न करिब १ करोड १० लाख रुपैयाँ खर्च हुनेछ ।

प्रतियोगिताअघि मङ्सिर १२ गतेदेखि एकेएफ रेफ्री सेमिनार सातदोबाटोस्थित कराते एकेडेमी हलमा हुनेछ ।  मङ्सिर १५ गते दक्षिण एसियाली कराते महासङ्घको कांग्रेस पनि हुनेछ ।