देशभर श्रीकृष्ण जन्माष्टमी पर्व मनाइँदै

काठमाडौँ / ‘श्रीकृष्ण जन्माष्टमी’ पर्व आज देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक भावले मनाइँदै छ । वैदिक सनातन धर्मावलम्बीले ज्ञान,भक्ति र कर्मयोगका प्रणेता भगवान् श्रीकृष्णको जन्मोत्व धूमधामका साथ मनाउँदै छन् ।

द्वापर युगमा भाद्रकृष्ण अष्टमीको मध्यरातमा भगवान् श्रीकृष्णको जन्म भएकाले आजको दिनलाई ‘श्रीकृष्ण जन्माष्टमी’ र रातलाई ‘मोह रात्रि’ भनिन्छ । यस दिन देशभरिका कृष्ण मन्दिरमा भगवान् श्रीकृष्णको पूजा–आराधना, प्रवचन, भजन कीर्तन गरी भक्ति भावले मनाइँदै छ । आज विशेष गरी महिला, र पुरुष पनि ‘व्रत’ बसी रातभर जाग्राम बस्ने प्रचलन छ ।

अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान् विष्णुको आठौँ अवतारका रूपमा जन्मिएका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए ।

हिन्दु धर्मावलम्बीहरूले ‘श्रीमद् भागवत गीता’ लाई पवित्र ग्रन्थको रूपमा मान्दै र पुज्दै आएका छन् । महाभारत युद्धमा श्रीकृष्णले कुरुक्षेत्रमा पाण्डव र कौरवसँगको लडाइँमा संलग्न पाण्डवमध्येका अर्जुनलाई उपदेश दिने क्रममा स्वयम् आफ्नै मुखारविन्दबाट व्यक्त गरेका उपदेश ‘श्रीमद् भागवत गीता’ पवित्र ग्रन्थ मानिन्छ ।

बाल्यकालदेखि नै आफ्ना विचित्र लीला देखाएका श्रीकृष्णले सबै अन्यायको विरुद्ध सत्यको बाटो देखाएर सबैलाई सत्मार्ग लाग्न प्रेरणा दिएका छन् ।

श्रीकृष्णले पुतना, आफ्नै मामा कंश, जरासन्ध र शिशुपालजस्ता दानवी प्रवृत्तिको संहार गर्नुभएको पौराणिक ग्रन्थमा उल्लेख छ । देशभरका कृष्ण मन्दिरहरूमा आज पूजा आराधना गरी उत्सव मनाइँदै छ । आज पाटनको मङ्गलबजारस्थित प्रसिद्ध कृष्ण मन्दिरमा ठुलो मेला लाग्दछ । काठमाडौँ उपत्यका सहित देशका विभिन्न स्थानमा श्रीकृष्ण जन्माष्टमी विशेष विभिन्न झाँकी निकाल्ने,भजन कीर्तन गर्ने तथा रथ र शोभा यात्रा गर्ने गरिन्छ । पर्वका अवसरमा सरकारले आज देशभर सार्वजनिक बिदा दिएको छ ।