बेलडाँगी शरणार्थी शिविरमै निर्मित लघु चलचित्र ‘देश दुखेको बेला’ प्रदर्शन हुँदै
सहयात्री ढकाल
कोलम्बस, ओहायो / झापाको बेलडाँगीस्थित भुटानी शरणार्थी शिविरभित्रै निर्माण गरिएको लघु चलचित्र ‘देश दुखेको बेला’ प्रदर्शन हुने भएको छ।
भुटानी शरणार्थी समुदायका कथा, जीवनका भोगाइ र भावनात्मक यथार्थलाई चलचित्रमार्फत उजागर गर्ने उद्देश्यले निर्माण गरिएको उक्त चलचित्र सन् २०२६ अक्टोबर ४ देखि ७ सम्म बेलडाँगीस्थित नाट्य हलमा प्रदर्शन गरिने भएको हो।
चलचित्रले शरणार्थी समुदायका अनुभव, पीडा, पहिचान र सामाजिक अवस्थालाई कलात्मक प्रस्तुतिमार्फत दर्शकमाझ ल्याउने लक्ष्य राखेको छ। आयोजकका अनुसार चलचित्रको प्रदर्शन प्रत्येक दिन साँझ ५:३० बजे हुनेछ।
भुटानी रिफ्युजी आर्ट एन्ड भिजुअल प्रोडक्सन्सको प्रस्तुति तथा एसएमसी बेलडाँगीसँगको सहकार्यमा तयार भएको चलचित्रको निर्माण सेक्मुरी क्लबले गरेको हो। चलचित्रको कथा, पटकथा तथा निर्देशन विरेन मगरले गरेका छन्।
चलचित्रमा जङ्गा मगर, भीममाया सुब्बा, जसबहादुर गुरुङ, गणेश घिमाल, धनमाया मगर, सञ्जित राई, बिमला सुब्बा, शर्मिला हाङ राई, धनमान राई र बिरेन बिस्वाललगायत कलाकारहरूको अभिनय रहेको छ।
आयोजकले सम्पूर्ण भुटानी शरणार्थी समुदायलाई चलचित्र प्रदर्शनमा सहभागी भई स्थानीय कलाकार तथा सर्जकहरूको सिर्जनालाई प्रोत्साहन गर्न हार्दिक निमन्त्रणा गरेको छ।
शरणार्थी शिविरभित्रै स्थानीय कलाकार, सर्जक र युवाहरूको सक्रियतामा चलचित्र निर्माण हुनु समुदायको सिर्जनात्मक क्षमता र सांस्कृतिक पहिचान संरक्षणको दृष्टिले अर्थपूर्ण प्रयासका रूपमा हेरिएको छ।
विस्थापन, जन्मभूमिबाट टाढिनुपर्दाको पीडा, पहिचानको खोजी र सामाजिक अनुभूतिजस्ता विषयलाई समेट्दै ‘देश दुखेको बेला’ ले एउटा समुदायको सामूहिक संवेदनालाई चलचित्रको माध्यमबाट अभिव्यक्त गर्ने प्रयास गरेको छ। यसले भुटानी शरणार्थी समुदायका मौलिक कथा, अनुभव र सांस्कृतिक स्मृतिलाई नयाँ पुस्तासम्म पुर्याउनसमेत योगदान गर्ने अपेक्षा गरिएको छ।
स्थानीय स्रोत, साधन, प्रतिभा र सिर्जनात्मक प्रयासको उपयोग गरेर निर्माण गरिएको यस चलचित्रले आफ्नै कथा आफैँ भन्ने समुदायको चाहना र प्रतिबद्धतालाई प्रतिबिम्बित गरेको छ। निर्माण टोलीले दर्शकहरूको साथ, समर्थन र उत्साहजनक सहभागिता प्राप्त हुने विश्वास व्यक्त गरेको छ।
