अस्ट्रेलियाले अन्तिम १६ मा स्थान पक्का गर्यो
काठमाडौं । एएफसी एशियन कप फुटबलमा अस्ट्रेलियाले अन्तिम १६ मा स्थान पक्का गरेको छ । समूह बीमा लगातार दोस्रो खेल जित्दै अस्ट्रेलियाले अन्तिम १६ मा स्थान पक्का गरेको हो ।
अस्ट्रेलिया अन्तिम १६ मा प्रवेश गर्ने दोस्रो टिम पनि भएको छ । यसअघि घरेलु टोली कतारले समूह एबाट अन्तिम १६ मा स्थान पक्का गरेको थियो । विहीवार कतारमा जारी प्रतियोगितामा अस्ट्रेलियाले सिरियालाई १–० गोल अन्तरले पराजित गरेको हो ।
सिरियाविरुद्ध दोस्रो हाफमा गरेको एक गोल नै अस्ट्रेलियालाई अन्तिम १६ मा स्थान पक्का गर्न पर्याप्त भयो । अस्ट्रेलियाका लागि ज्याक्सन इर्भिनले ५९ औं मिनेटमा गोल गर्दै जित दिलाए । समूह चरणको अन्तिम खेलमा अस्ट्रेलियाले उज्वेकिस्तानसँग खेल्ने छ । पहिलो खेलमा भारतलाई पराजित गरेको थियो ।
समूहमा अस्ट्रेलियाले २ खेलबाट ६ अंक बनाएको छ भने उज्वेकिस्तान १ अंकका साथ दोस्रो र सिरिया पनि १ अंकका साथ तेस्रो स्थानमा छ । भारतले भने खाता खोलेको छैन । भारतले विहीबार नै उज्वेकिस्तानसँग खेल्ने छ ।