फिलाडेल्फिया विमानस्थलमा २ लाख ५० हजार डलरभन्दा बढीका गरगहना जफत
फिलाडेल्फिया, पेन्सिल्भेनिया / अमेरिकाको फिलाडेल्फिया अन्तर्राष्ट्रिय विमानस्थलमा २ लाख ५० हजार डलरभन्दा बढी मूल्यका गरगहना घोषणा नगरी ल्याएको आरोपमा अमेरिकी भन्सार तथा सीमा सुरक्षा निकाय (सीबीपी) ले एक यात्रुको गरगहना जफत गरेको छ। साथै, ती यात्रुको ग्लोबल इन्ट्री सदस्यता खारेज गर्ने प्रक्रिया पनि सुरु गरिएको छ।
सीबीपीका अनुसार अक्टोबर २५ मा नेदरल्यान्ड्सको एम्स्टर्डमबाट आएको विमानमा सवार पेन्सिल्भेनियाकी ती महिला ग्लोबल इन्ट्री कार्यक्रमकी सदस्य थिइन्।
विमानस्थलमा पुगेपछि उनको सामान थप जाँचका लागि पठाइएको थियो। सुरुमा उनले आफूले केही हजार डलरका स्मारिका तथा उपहार सामग्री मात्रै किनेको बताएकी थिइन्।
तर, यात्रु अमेरिका आइपुग्नुअघि नै सीबीपीका अधिकारीहरूले उनले विदेशबाट महँगा गरगहना खरिद गरेको सूचना प्राप्त गरिसकेका थिए।
सीबीपीका अनुसार उनले १ लाख ८३ हजार ८१८ डलर मूल्यको कार्टियर ब्रेसलेट र ६७ हजार ८११ डलर मूल्यको कार्टियर औँठी खरिद गरेकी थिइन्। दुवै गरगहनाको कुल मूल्य २ लाख ५१ हजार ६२९ डलर रहेको छ।
अधिकारीहरूले पटकपटक ती सामानबारे घोषणा गर्न अवसर दिए पनि उनले सुरुमा जानकारी गराइनन्। आफूहरूले खरिदबारे जानकारी पाइसकेको बताएपछि मात्रै उनले गरगहना स्वीकार गरेकी थिइन्।
पछि उनले गरगहनाका बक्स र खरिदका रसिदसमेत फालिसकेको बताएकी थिइन्।
भन्सारसम्बन्धी संघीय कानुन उल्लंघन गरेको आरोपमा सीबीपीले ती गरगहना जफत गरेको जनाएको छ।
सीबीपीका फिलाडेल्फिया क्षेत्रीय बन्दरगाह निर्देशक इलियट एन. अर्टिजले ग्लोबल इन्ट्री सदस्यता विशेष सुविधा भएको उल्लेख गर्दै सदस्यहरूले अमेरिकी कानुन र भन्सारसम्बन्धी नियम पूर्ण रूपमा पालना गर्नुपर्ने बताएका छन्। नियम उल्लंघन भए सदस्यता खारेज गर्न सकिने उनको भनाइ छ।
ग्लोबल इन्ट्रीमा के हुन्छ व्यवस्था?
ग्लोबल इन्ट्री अमेरिकी भन्सार तथा सीमा सुरक्षा निकायको विश्वसनीय यात्रु कार्यक्रम हो। यसका सदस्यले विदेशबाट अमेरिका फर्किँदा विमानस्थलमा छिटो भन्सार प्रक्रिया पूरा गर्न पाउँछन्। योग्य सदस्यले आन्तरिक उडानका लागि टीएसए प्रिचेक सुविधासमेत प्राप्त गर्छन्।
तर, यो सुविधा पाउन सदस्यले निरन्तर कार्यक्रमका सर्त र अमेरिकी कानुन पालना गर्नुपर्छ।
सीबीपीका अनुसार विदेशबाट अमेरिका फर्किने यात्रुले खरिद गरेका सबै सामान, उपहार तथा व्यक्तिगत प्रयोगका वस्तुसमेत भन्सारमा घोषणा गर्नुपर्छ।
सामान्य अवस्थामा यात्रुले विदेशबाट ल्याउने सामानमा ८०० डलरसम्मको व्यक्तिगत भन्सार छुट पाउन सक्छन्। त्योभन्दा बढी मूल्यका सामान ल्याउन पाइने भए पनि अनिवार्य रूपमा घोषणा गर्नुपर्छ र अतिरिक्त भन्सार शुल्क लाग्न सक्छ।
सीबीपीले सामान लुकाउने वा महँगा खरिदको विवरण नखुलाउने कार्यले सामान जफत हुनुका साथै जरिवाना र अन्य कानुनी कारबाहीसमेत हुन सक्ने चेतावनी दिएको छ।
