‘मोस्ट वान्टेड’ सूचीमा रहेका भारतीय नागरिक अमेरिका-क्यानडा सीमामा पक्राउ
आल्बर्ग, भर्मोन्ट / अमेरिकी बोर्डर पेट्रोलले मोस्ट वान्टेड सूचीमा रहेका भारतीय नागरिकलाई अमेरिका क्यानडा सीमा पक्राउ परेको जनाएको छ ।
अमेरिकी बोर्डर पेट्रोलले भर्मोन्टको आल्बर्गमा जुलाई १६ एफबीआईको ‘मोस्ट वान्टेड’ सूचीमा रहेका फरार अपराधी भारतीय नागरिक नितिश कौशललाई आल्बर्गस्थित अमेरिका-क्यानडा सीमा नजिकबाट पक्राउ गरेको हो ।
बोर्डर पेट्रोलले सोमबार जारी गरेको विज्ञप्ति अनुसार घटना जुलाई १६ तारिख करिब बिहान २ बजे सुरु भएको थियो, जब अमेरिकाको बोर्डर पेट्रोलको स्वान्टन सेक्टरका एजेन्टहरूले आल्बर्गको ब्लेयर रोडमा बाटो थुनेर राखिएको एउटा बिग्रिएको र बेवारिसे सवारी साधन फेला पारेका थिए।
न्युयोर्कमा दर्ता भएको उक्त सवारी साधन सीमा नजिकै भेटिएकाले यसले सीमापार अवैध गतिविधि र जनसुरक्षामा खतरा हुनसक्ने आशंका बढाएको थियो।
बोर्डर पेट्रोलका एजेन्टहरूले भर्मोन्ट स्टेट पुलिसलाई सम्पर्क गरे, जसले तुरुन्तै उक्त सवारी साधनलाई टो गरेका थिए । सोही बिहान , करिब ६:३० बजे, बोर्डर पेट्रोल एजेन्टहरूले ब्लेयर रोडका एक बासिन्दाबाट एक अज्ञात व्यक्तिले उनीहरूको घरमा जबरजस्ती घुस्न खोजिरहेको रिपोर्ट पाएका थिए ।
त्यस पछि सुरक्षाकर्मी तुरुन्तै घटनास्थलमा पुगे, जहाँ उनीहरूले भारतका २६ वर्षीय पुरुष नितिश कौशललाई फेला पारेर नियन्त्रणमा लिएका थिए ।
विस्तृत रेकर्ड जाँचबाट ती विदेशी नागरिकविरुद्ध सन् २०२२ देखि एउटा सक्रिय ‘नोटिस टु एपियर’ जारी थियो । यो भनेको अदालतमा उपस्थित हुने आदेश हो । यो पुर्जी पाउनुको अर्थ उक्त व्यक्तिविरुद्ध अमेरिकाबाट निकाला गर्ने प्रक्रिया सुरु भएको छ र उनले अध्यागमन न्यायाधीशका अगाडि अदालतमा उपस्थित हुनुपर्छ।
यस्ती ती भारतीय नागरिक विरुद्ध अपहरणको मुद्दामा क्यालिफोर्नियाको लस एन्जलसबाट एफबीआईको वारेन्ट समेत जारी भएको थियो।
कौशललाई जुलाई १५, २०२६ मा मात्र आधिकारिक रूपमा एफबीआईको मोस्ट वान्टेड सूचीमा थपिएको थियो।
थप अनुसन्धानले उनको लामो आपराधिक इतिहास उजागर गर्यो, जसमा हत्या र आपराधिक षड्यन्त्रका आरोपहरूका साथै क्यालिफोर्नियाको सेक्रामेन्टोमा उच्च-क्षमताको म्यागजिन बिक्री र ओसारपसार गरेकोमा दोषी ठहरिएको घटना समेत सामेल छ। उक्त सजायका लागि कौशलले ६० दिन जेल र २४ महिनाको निगरानीमा बिताएका थिए।
‘पक्राउ पर्ने क्रममा कौशलको साथबाट सानो परिमाणमा लागू औषध जस्तो देखिने पदार्थ फेला परेको छ, जसको प्रयोगशालामा परीक्षण हुन बाँकी छ।’ बोर्डर पेट्रोलको विज्ञप्तिमा भनिएको छ ।
विज्ञप्तिका अनुसार उनको स्वास्थ्य परीक्षणपछि एफबीआईले हिरासतमा लिएको छ र अनुसन्धान तथा कानुनी कारबाहीलाई अघि बढाउनेछ।
“सीमा सुरक्षा नै राष्ट्रिय सुरक्षा हो, र हाम्रा समुदायहरूको सुरक्षा जनताको सतर्कता र सहयोगमा निर्भर गर्दछ,” स्वान्टन सेक्टरका कार्यवाहक मुख्य बोर्डर पेट्रोल एजेन्ट रिचर्ड जे. फोर्टुनाटोले भने। “हामी सबैलाई प्रोत्साहन गर्छौँ—यदि तपाईँले केही शङ्कास्पद देख्नुभयो भने, तुरुन्तै खबर गर्नुहोस्। यस मामिलामा जनताको सतर्कता र द्रुत रिपोर्टिङले महत्त्वपूर्ण भूमिका खेल्यो।”
