कुलमानका नाममा प्रचण्ड प्रमिथस बन्न खोजे : ओली

काठमाडौँ । प्रधानमन्त्री केपी शर्मा ओलीले माओवादी केन्द्रका अध्यक्ष पुष्पकमल दाहाल प्रचण्डले वर्षौँ लगाएर जे काम गरिएको हुन्छ, त्यसलाई चमत्कार र जादुको रुपमा व्याख्या गर्न खोजेको बताएका छन् । 

मंगलबार सुजाता कोइरालाको ‘म र मेरो सानो बुबा’ लोकार्पण समारोहमा उनले अध्यक्ष प्रचण्डले लोडसेडिङ आफूले हटाएको दाबी गरेको भन्दै प्रमिथस बन्न खोजेको आरोप लगाए । 

उनले भने, ‘उबेला पृथ्वीमा अन्धकार थियो, स्वर्ग उज्यालो थियो, चिसो थियो । पृथ्वीका मान्छेहरूलाई पनि उज्यालो चाहिन्छ भनेर देवताका भाइहरूमध्ये सबैभन्दा कान्छा प्रमिथसले आगो चोरेर पृथ्वीमा ल्याए । त्यसबापत उनलाई हजार वर्ष ढुङ्गाको चेपमा कैद गरेर राखिएको थियो । ती मित्रले त्यस्तै गरेर व्याख्या गर्नुभएछ । उहाँले प्रमिथसले जस्तै उज्यालो ल्याउनुभयो । अघिल्लो चार वर्षको कार्यकाल पूरै उहाँले त्यहीँ काम गरेर पूरा गर्नुभएको थियो । त्यस बेला ल्याउनुभएको थियो कि ।  उहाँले नियुक्ति गर्नेवित्तिकै आगो बोकेर, बिजुली बोकेर, चिम बोकेर आउनुभयो कि ? वर्षौँ लगाएर जे काम गरिएको हुन्छ, त्यसलाई चमत्कारको रुपमा, जादुको रुपमा व्याख्या गर्ने ? कोही पनि साथीहरूलाई यस्ता कुराको भ्रममा नपर्न आग्रह गर्न चाहन्छु ।’

त्यस्तै उनले बाहिरबाट खोजेर नल्याई त्यहीँबाट अवकाशप्राप्त भइसकेको मान्छेलाई नियुक्ति गरेको भन्दै प्रचण्डले निष्कासन गरेर वा सरुवा भनेर अर्को ठाउँमा निकम्मा बनाएर राखिदिएको बताए । 

उनले भने, ‘एक जना मित्रको स्टटास देख्या थिएँ । त्यहाँबाट अवकाशप्राप्त भइसक्या मान्छेलाई, त्यहीँबाट हुर्किएर आएको त्यहीँको मान्छेलाई वा क्याडरलाई नियुक्ति दिएको हो । बाहिरबाट खोजेर ल्याएको होइन ।  त्यस्तो मान्छे उहाँले निष्कासन गर्नुभयो वा सरुवा भनेर अर्को ठाउँमा निकम्मा बनाएर राखिदिनुभयो जहाँ उसको कार्यक्षेत्र होइन । अनि रिटायर्ड मान्छेलाई फेरि ल्याएर राखिदिनुभयो ।’