वासिङ्टन डीसी नजिकै भएको कार दुर्घटनामा दुई नेपालीको मृत्यु

पेन्सिल्भेनिया । वासिङ्टन डिसीबाट करिब २५ मिनेट दूरीमा रहेको डलर्स इन्टरनेसनल एयरपोर्टको नजिक साउथ राइडिङ, लाउडन काउन्टी भर्जिनियामा भएको कार दुर्घटनामा दुई नेपालीको मृत्यु भएको छ।

मृतकहरू पश्चिम रुकुम आठबिसकोटका एक व्यक्ति र बर्दियाका अर्का व्यक्ति रहेको जनाइएको छ।

दुर्घटना गएराति साढे १२ बजे भएको हो। गाडीले दुई वटा रुखलाई ठक्कर दिएपछि बाटोको जानकारी दिने होडिङ बोर्डमा ठोक्किएको थियो। मृतकहरू नजिकै रहेको आगो नेपाली रेस्टुरेन्टका कर्मचारी रहेको खुलेको छ।

दुर्घटनाको समयमा गाडी नेपाली मूलका विजय तामाङले चलाइरहेका थिए। तामाङले मादक पदार्थ सेवन गरेर गाडी चलाएको आरोपमा उनलाई स्थानीय प्रहरीले पक्राउ गरी धरौटीमा छुट्न नमिल्ने भनी जेल चलान गरेको छ।

दुर्घटनामा गाडीचालक तामाङसहित अर्का एक व्यक्ति घाइते भएका छन्। उनीहरूको उपचार भइरहेको छ भने एकजना सघन कक्षमा रहेका छन्। गाडीचालकको उपचारपछि प्रहरी हिरासतमा राखिएको छ।