माइक पेन्सले गरे राष्ट्रपतिको चुनाव नलड्ने घोषणा
पेन्सिल्भेनिया । पछिल्लो समय अमेरिकामा आगामी राष्ट्रपतीय निर्वाचनका लागि चर्चा बढ्दै गएको छ । अमेरिकाका पूर्व उपराष्ट्रपति माइक पेन्सले रिपब्लिकन पार्टीको राष्ट्रपति पदको उम्मेदवारीका लागि आफ्नो दाबी त्यागेका छन् । उनले ह्वाइट हाउसका लागि आफ्नो चुनावी अभियान समाप्त गरिसकेका छन् । पूर्व राष्ट्रपति डोनाल्ड ट्रम्पलाई पेन्सको चुनाव नलड्ने कुराले ठूलो राहत दिएको छ ।
अमेरिकी सञ्चारमाध्यमका अनुसार माइक पेन्स शनिबार लस भेगासमा आयोजित यहुदी गठबन्धन भेलामा सहभागी भएका थिए । सो क्रममा उनले धेरै छलफलपछि आजदेखि राष्ट्रपति पदको प्रचारप्रसार स्थगित गर्ने निर्णय गरेको बताए । मलाई थाहा छ यो कठिन लडाई हो तर मलाई कुनै पछुतो छैन। पेन्स राष्ट्रपतिको दौडबाट पछि हट्ने पहिलो उम्मेदवार बनेका छन्।
विवके रामास्वामी
विवेक रामास्वामी एक करोडपति व्यवसायी हुन् र उनले अमेरिकी राज्य आयोवामा आफ्नो उम्मेदवारीको प्रचार गर्न धेरै कार्यक्रमहरू आयोजना गर्दैछन्। रामास्वामीले आफू विचारमा आधारित अभियान सुरु गर्नेतर्फ केन्द्रित रहेको बताउँछन् । विवेक रामास्वामीका पिता एक जनरल इलेक्ट्रिक इन्जिनियर थिए र भारत केरलाबाट अमेरिकामा बसोबास सरेका थिए। रामास्वामीकी आमा मनोचिकित्सक थिइन्। रामास्वामीको जन्म अमेरिकाको सिनसिनाटीमा भएको थियो । हार्वर्ड र येल विश्वविद्यालयबाट शिक्षित विवेक रामास्वामीको कुल सम्पत्ति करिब ५० करोड डलर छ। विवेक रामास्वामी एक बायोटेक कम्पनीका मालिक हुन्।
निक्की हेली
रामास्वामीका साथै साउथ क्यारोलिनाका पूर्व गभर्नर निक्की हेलीले पनि अमेरिकी राष्ट्रपति चुनाव लड्ने घोषणा गरेकी छन् । निक्की हेली पनि रामास्वामीजस्तै भारतीय मूलकी अमेरिकी नागरिक हुन्। हेलीले रिपब्लिकन पार्टीबाट आफ्नो दाबी पेश गर्नेछिन् । रिपब्लिकन पार्टीबाट पूर्व राष्ट्रपति डोनाल्ड ट्रम्पले पनि चुनाव लड्ने घोषणा गरेका छन्।
