सुशासन तथा सामाजिक न्याय सरकारको मूल मन्त्र : गृहमन्त्री श्रेष्ठ
काठमाडौँ । उपप्रधान तथा गृहमन्त्री नारायणकाजी श्रेष्ठले, सरकारले सुशासन, तथा सामाजिक न्यायलाई मूल मन्त्र बनाएर काम गरिरहेको दाबी गरेका छन् ।
ज्यापु महागुथिको चौथो राष्ट्रिय एकीकृत महाधिवेशनलाई सम्बोधन गर्दै, उनले राजनीतिक परिवर्तनबाट राजनीतिक अधिकार मात्रै होइन, आवश्यकता अनुसारको परिवर्तन भएको प्रत्यक्ष अनुभूति गर्न पाउने स्थिति सिर्जना गर्न आवश्यक भएको भन्दै त्यसको लागि समृद्धिको कार्यभारलाई केन्द्रीय कार्यभार बनाएको बताए ।
उनले भने, ‘राजनीतिक परिवर्तनबाट राजनीतिक अधिकार मात्रै होइन, हाम्रो जीवन फेरिएको छ, शिक्षा, स्वास्थ्य, रोजगारी, खाद्यान्न, आवासलगायत आवश्यकता अनुसारको परिवर्तन गरेर यो नयाँ राजनीतिले हाम्रो जीवन परिवर्तन गरेको छ भन्ने कुरा प्रत्यक्ष अनुभूति गर्न पाउने स्थिति सिर्जना गर्नुपर्छ । त्यसैले आजको केन्द्रीय कार्यभार हामीले समृद्धिको कार्यभार बनाएका छौ । त्यो पूरा गर्न सरकारले सुशासन, समृद्धि र सामाजिक न्यायलाई कार्यभारको मूल मन्त्र बनाएको छ । यही आधारमा काम पनि भइरहेको छ ।’
उनले दलाल पुँजीवादको जगजगीका कारण राष्ट्रिय पुँजी कम हुने, उत्पादन बढ्न नसकेको र देश गरिबीतिर गएको भन्दै यसको विरुद्धको संघर्ष सबैभन्दा आवश्यक संघर्ष भएको बताए ।
उनले भने, ‘नेपाल बिग्रिएको किन भने दलाल पुँजीवादको जगजगी भयो पुँजी लगानी, उद्योग धन्दामा लगानी, रोजगारी दिएर विकास गर्नु पनि छैन । आफैले काम गरेर श्रम गरेर पैसा कमाउँनु पनि छैन । त्यसको सट्टा राज्यमा बसेका मानिसलाई प्रयोग गर्ने, राजनीतिक नेता उच्च पदका व्यक्तिहरूलाई संलग्न गराउने र पैसा कमाउने तरिकाले गर्दा राष्ट्रिय पुँजी बढ्न सकेन, उत्पादन बढ्न सकेन् देश गरिबीतिर गइरहेको छ । यसको विरुद्धको संघर्ष सबैभन्दा आवश्यक संघर्ष हो ।’
त्यस्तै उनले नेपालका हरेक परिवर्तनमा आदिवासीको महत्त्वपूर्ण भूमिका रहेको स्मरण गर्दै ज्यापु समुदायको त्यसमा उल्लेख्य योगदान रहेको बताए ।
‘नेपाल निमार्णमा महत्त्वपूर्ण भूमिका खेल्ने आदिवासी हो, र यसले संस्कृतिको रक्षामा महत्त्वपूर्ण भूमिका खेलेको समूह हो ज्यापू जाती । आज देशमा प्रधानमन्त्रीले देशको नेतृत्व गर्ने, म उपप्रधान एवं गृहमन्त्री हुने देश बहुदलीय प्रतिस्पर्धामा अगाडि बढ्ने, संघीयता समावेशीकरणसहितको लोकतन्त्र स्थापित हुने र त्यसलाई संविधानमा संस्थागत गरेर अगाडि बढ्ने जुन परिवर्तन भएको छ ।’ उनले भने ‘त्यसमा नेपालका सबै जनसमुदायले उल्लेखनीय भूमिका खेलेको छ । तर त्यसमा ज्यापु समुदायको भूमिका अत्यन्तै महत्त्वपूर्ण रहेको कुरा न्यून मूल्याङ्कन गर्न मिल्दैनन् । ज्यापु समुदायको भूमिका विना अहिलेको परिवर्तन सम्भव थिएन । ’