ललिता निवासको जग्गा छिट्टै सरकारको नाममा दर्ता हुन्छ : मन्त्री श्रेष्ठ
काठमाडौँ । उपप्रधान तथा गृह मन्त्री नारायणकाजी श्रेष्ठले बालुवाटारमा रहेको ललिता निवासको जग्गा छिट्टै सरकारको नाममा ल्याउने दाबी गरेका छन् ।
बुधवार चितवनको माडीमा आयोजित कार्यक्रमलाई सम्बोधन गर्दै उनले ललिता निवास जग्गा सरकारको स्वामित्वमा ल्याउन ठोस पहल थालिएको दाबी गर्दै छिटै सरकारकै नाममा दर्ता हुने जिकिर गरे ।
उनले भने, ‘बालुवाटारमा ललिता निवास सरकारी जग्गा, दलाल कर्मचारी र प्रभावशाली राजनीतिक व्यक्तिहरू मिलेर व्यक्तिको नाममा लैजाने काम भएको छ । त्यसलाई अनुसन्धान गरेर ती व्यक्तिलाई कानुनको दायरामा ल्याउँने प्रक्रिया अगाडी बढाइएको छ । छिट्टै त्यो जग्गा सरकार मातहतमा ल्याउँने ठोस पहल कदमी चालिने छ र विश्वास छ । त्यो सरकारी जग्गा छिटै सरकारकै नाममा दर्ता हुने छ।’
उनले ६० किलो सुन तस्करीको जरासम्मै पुग्ने सारा नेटवर्क पहिचानगरी कानुनको दायरामा ल्याई कारबाही गरिने प्रतिबद्धता जनाए । सुन तस्करी प्रकरण अनुसन्धानरत रहेको र केही दिन भित्रमा नै निष्कर्षमा पुग्ने उनको जिकिर छ ।
उनले भने, ‘देशभित्र अवैध रूपमा जुन सुनको तस्करी भइरहेको छ । अहिले पछिको ६० किलो सुनको तस्करीलाई आधारित बनाएर त्यसका अपराधीहरुको जरासम्मै पुग्ने सारा नेटवर्क पहिचान गर्ने गरी कानुनको दायरामा ल्याएर कारबाही गर्ने प्रक्रिया अनुसन्धानरत छ । केही दिन भित्रै निष्कर्षमा पुग्ने छ ।’
