सत्ता गठबन्धनबाट ३ सहित ४ जनाको उम्मेदवारी दर्ता
काठमाडौं । चैत ३ गते हुन लागेको उपराष्ट्रपति पदमा ४ जनाको उम्मेदवारी दर्ता परेको छ । प्रभु साह पनि थपिएपछि सत्तारुढ गठबन्धन १० दल बनेका बेला गठबन्धनबाट ३ जनाको र एमालेबाट एक जना गरी ४ जनाको उपराष्ट्रपति पदमा उम्मेदवारी दर्ता भएको हो ।
सत्ता गठबन्धनबाट जनता समाजवादी पार्टी, नेपालबाट २ जना र जनमत पार्टीबाट १ गरी तीन जनाको उम्मेदवारी परेको हो । जसपाबाट जसपा संसदीय दलका नेता रामसहायप्रसाद यादव र प्रमिला यादवको उम्मेदवारी दर्ता भएको छ ।
प्रमिलाको प्रस्तावकमा रञ्जु झा, मृगेन्द्रकुमार सिंह यादव, नवलकिशोर शाह, दीपक कार्की, राजकिशोर यादव रहनुभएको छ भने समर्थकमा अनिता देवकोटा, विमला सुवेदी, सीता गुरूङ, जयन्ती राई, मनिस सुमन रहेका छन् । त्यस्तै रामसहायप्रसाद यादवको प्रस्तावकमा जसपा नेता अशोककुमार राई, प्रदीप यादव, किशान श्रेष्ठ, शक्ति बस्नेत, रमेशजंग रायमाझी छन् भने समर्थकमा रेखा यादव, अम्बिका काफ्ले, प्रकाश ज्वाला, खिमलाल देवकोटा, भानुभक्त जोशी रहेका छन् ।
त्यस्तै १० दलीय गठबन्धनबाट नै जनमत पार्टीकी नेता ममता झाले पनि उपराष्ट्रपति पदका लागि उम्मेदवारी दर्ता गराएकी छिन् । १० दलीय गठबन्धनबाट उनले पनि उपराष्ट्रपति पदमा उम्मेदवारी दिएकी हुन् ।
अब्दुल खान, अनिता देवी, गंगाराम चौधरी, अविराम शर्मा, रुपाकुमारी यादव प्रस्तावकमा रहेका छन् भने गोमालाम सापकोटा, विनिताकुमारी सिंह, वसन्तकुमार कुशवाह, रामप्रकाश चौधरी, रानीकुमारी तिवारी समर्थक बसेका छन् ।
यस्तै, नेकपा एमालेबाट उपाध्यक्ष अष्टलक्ष्मी शाक्यले उम्मेदवारी दर्ता गराएकी छिन् । अध्यक्ष केपी शर्मा ओली, उपाध्यक्ष सुवासचन्द्र नेम्वाङ, छविलाल विश्वकर्मा, गोकर्ण बिष्ट, रघुवीर महासेठ प्रस्तावकमा रहेका छन् भने कृष्णगोपाल श्रेष्ठ, महेश बर्तौला, तुलसा दाहाल, भगवती न्यौपाने, यशोदा रिजाल समथकमा रहेका छन् ।
निर्वाचन आयोगले राष्ट्रपतिमा खस आर्य समूदायबाट रामचन्द्र पौडेल निर्वाचित भएकाले फरक लिंग र समूदाय भन्दै महिला हुनुपर्ने सर्तसहितको विज्ञप्ति सार्वजनिक गरेकाले उपराष्ट्रपति पदमा जसपाले महिला र पुरुष दुवैलाई उम्मेदवार बनाएको बुझिएको छ ।