डोल्पा र मुगुमा गठबन्धन दलबीच भएन सहमति,डोल्पामा एक्ला एक्लै लड्ने,मुगुमा भोलि टुंगो लगाउने
हेमन्त केसी/खड्क सुनार
सुर्खेत । आशन्न वैशाख ३० मा हुन गइरहेको स्थानीय तह निर्वाचनमा डोल्पामा गठबन्धन गर्ने विषयमा सत्तारुढ दलहरुबी सहमति हुन सकेको छैन् । सहमति हुन नसक्दा ति दलहरु एक्ला एक्लै चुनाव लड्ने तयारीमा रहेका छन् । चुनावी गठबन्धन र भागबण्डाका लागि छलफलमा बसेका दलहरु आ-आफ्नो अडानमा रहँदा सहमति हुन नसकेको हो ।
केन्द्रीय गठबन्धनको निर्णय र सर्कुलर अनुसार जिल्लामा पनि सत्तासिन दलहरु गठबन्धन गरेर चुनाव लड्ने भने पनि सबैले ठूलो भाग खोजेपछि सहमति नभएको कांग्रेस डोल्पाका सभापति दिपेन्द्र शाहीले बताए ।
नेकपा (एकीकृत समाजवादी) र नेकपा ( माओवादी केन्द्रले ) ठूलो भाग खोजेपछि सहमति नभएको कांग्रेसको आरोप छ ।
डोल्पाका ठूलीभेरी , त्रिपुरासुन्दरी , उपल्लो डोल्पामा काइके, छार्काताङसोङ, डोल्पोबुद्ध, शे फोक्सुण्डो नेकपा एमालले जितेको थियो । त्यस्तै तल्लो डोल्पाको मुड्केचुला र जगदुल्ला गाउँपालिका माओवादी केन्द्रले जितेको थियो ।
केही समय अघि डोल्पोबुद्ध गाउँपालिकाका बहुमत वडाध्यक्ष सहित गाउँपालिकाका अध्यक्षले माओवादी केन्द्रमा प्रवेश गरेपछि माओवादीले स्थानीय तह जित्नेको संख्या बढेको थियो ।
कांग्रेसले कुनै पनि स्थानीय तह जितेको थिएन । अहिले एमालेबाट फुटेर निर्माण भएको समाजबादीले एमालेकै हिस्सा माग्दा सहमति नभएको शाहीले बताए । नेपाली कांग्रेसले कत्तै पनि भाग नपाउने भएपछि सहमति हुन नसकेको कांग्रेसको भनाइ छ ।
प्रदेशमा आफूहरुले एक्ला एक्लै लड्ने सहमति गरेर पत्र पठाएको सभापती शाहीले जानकारी दिए ।
डोल्पामा समाजवादी बलियो भएकाले माओवादी केन्द्र र नेपाली कांग्रेसले ठूलीभेरीमा प्रमुख दिनु पर्ने र अन्य स्थानीयतहमा समेत केन्द्रीय निर्णय अनुसार पद बाँडफाट हुनुपर्ने समाजवादीका अध्यक्ष नन्दसिंह बुढाले बताए ।
नेपाली कांग्रेस, नेकपा एकीकृत समाजवादी र माओवादी केन्द्रबीच डोल्पामा हुने भनिएको गठबन्धन टुट्ने भएपछि एमालेलाई सहज हुने एमालेका एक नेताले बताए । जनमत समेत भएको र २०७४ मा एमालेले जितेका सबै क्षेत्रमा समाजवादीले माग गरेको र जता एमाले बलियो छ त्यहाँ माओबादी केन्द्रलाई दिने र जहाँ एमाले कम्जोर छ त्यहाँ आफू लड्ने समाजवादीको अडानले गर्दा बैठकबाट बाहिरिएको माओवादी केन्द्रका केन्द्रीय सदस्य तथा डोल्पा जिल्ला ईन्चार्ज रामलाल बिकले जानकारी दिए ।
उनका अनुसार सबै क्षेत्रमा छोडेर बस्न नसक्ने भन्दै गठबन्धनबाट बाहिरिएको र अब स्थानीय तहको निर्वाचनको मिति समेत नजिकिएकोले एक्ला एक्लै लड्नुपर्ने अबस्था आएको उनले बताए । तर यसले गठबन्धन नै टुटी नसकेको र छलफल जारी रहेको उनले बताए ।
स्थानीय तहको निर्वाचनमा कुनै पनि तहमा कुनै पनि पदमा सहमति नभएकोले डोल्पामा गठबन्धन नहुने भन्ने निर्णय केन्द्रीय कार्यालयमा पठाइएको हो । गठबन्धन नहुने भएपछि एमालेले भने उम्मेद्वारमा समेत फेरबदल गर्ने संकेत देखिएको छ ।
मुगुमा गठबन्धन दलहरुबीच हुन सकेन सहमति, भोलि टुंगोमा पुग्ने दाबी
आगामी वैशाख ३० गते हुने स्थानीय तहको निर्वाचनका लागि गठबन्धनमा मुगुका चार दल छलफलमै ब्यस्त छन् । केन्द्रबाटै जिल्लामा स्थानीय तहको आवश्यकता अनुसार तालमेल गर्ने भनेर सर्कुलर भएपछि यहाँ गठबन्धन दलका नेताहरु छलफलमा व्यस्त बनेका हुन् ।
तालमेलको विषयमा छलफल गर्न नेपाली कांग्रेसका जिल्ला सभापति ऐन बहादुर शाही, एकीकृत समाजवादीका पोलिटब्युरो सदस्य कर्णाली प्रदेशका सह ईन्चार्ज तथा प्रदेश सरकारका भूमि ब्यवस्था कृषि तथा सहकारी मन्त्री चन्द्र बहादुर शाही, नेकपा माओवादि केन्द्र र जसपाका जिल्ला स्तरीय नेताहरु छलफलमा जुटेका हुन् ।
उनीहरुले तालमेल गर्ने कि नगर्ने भन्ने विषयमा छलफल गरेको करिब एक हप्ता भइ सकेको छ । तर हालसम्म टुगो लाग्न सकेको छैन ।
शुक्रबार दिउँसो बसेको गठबन्धनको बैठकमा पनि कुनै सहमति जुट् सकेन । बैठक भोलि विहान ७ बजे पुन बस्ने कांग्रेसका जिल्ला सभापति शाहीले बताए । ‘हामी भोलि नै टुंगो लगाउँछौं, र भोलि नै केन्द्रमा तालमेलको विषयमा जानकारी गराउँछौं ‘ उनले भने ।
निर्वाचन नजिकिँदै जादा यति खेर उम्मेवादार छनोटमा जानु पर्ने हो । तर उनीहरु उम्मेदवार त परै जाओस् तालमेल गर्ने कि नगर्ने भन्ने विषयमा समेत सहमत हुन सकेका छेनन् ।
कर्णाली प्रदेशका सत्तारूढ दलहरुले आज भागबण्डाको लागि निर्णयक छलफल सुरु गरेका छन् । कर्णालीका सबै जिल्लामा गठबन्धनको बैठक सुरु भएको छ ।
न्युज कारखाना