सवारीसाधन रिकलप्रति सतर्क रहन प्रशासनको आग्रह, फोर्ड र टोयोटाका लाखौँ गाडीमा समस्या
वाशिङ्टन। अमेरिकाको नेशनल हाइवे ट्राफिक सेफ्टी एड्मिनिस्ट्रेशनले चालकहरूलाई आफ्ना सवारीसाधनमा कुनै खुला रिकल छ कि छैन भनेर नियमित रूपमा जाँच गर्न आग्रह गरेको छ।
समयमै रिकल मर्मत नगर्दा दुर्घटनाको जोखिम बढ्न सक्ने भन्दै सेफ्टी एड्मिनिस्ट्रेशनले सतर्कता अपनाउन अनुरोध गरेको हो।
प्रशासनका अनुसार चालकहरूले आफ्नो सवारीसाधनको भीन नम्बर प्रयोग गरी भीन लुक अप उपकरण वा नेशनल सेफ्टी काउन्सिल (एनएससी) को चेक टु पोर्टेट सेवा मार्फत रिकलसम्बन्धी जानकारी लिन सक्नेछन्। यदि सवारीसाधनमा रिकल देखिएमा नजिकको डिलरशिपमा अपोइन्टमेन्ट लिएर निःशुल्क मर्मत गराउन सकिने व्यवस्था गरिएको छ।
निर्माता कम्पनीले निर्देशन दिएको खण्डमा सफ्टवेयर अपडेट प्राप्त भएको सुनिश्चित गर्नु पनि चालकहरूको जिम्मेवारी रहेको सेफ्टी एड्मिनिस्ट्रेशनले जनाएको छ। साथै, भविष्यमा लागू हुन सक्ने रिकलको जानकारी तुरुन्तै पाउन चालकहरूलाई आफ्नो सवारीसाधनको मेक, मोडेल र वर्ष अनुसार रिकल अलर्टमा दर्ता हुन पनि सुझाव दिइएको छ।
फोर्ड र टोयोटाका ठुला रिकल
अक्टोबर महिनामा फोर्ड कम्पनीले १४ लाखभन्दा बढी सवारीसाधन रिकल गरेको छ। सेफ्टी एड्मिनिस्ट्रेशनले अनुसार ती सवारीसाधनमा रिभर्स गर्दा रियरभ्यु क्यामेराको तस्बिर बिग्रिने, बीच–बीचमा हराउने वा पूरै नदेखिने समस्या देखिन सक्छ, जसले चालकको दृश्यता घटाएर दुर्घटनाको सम्भावना बढाउँछ।
यसैगरी, टोयोटा कम्पनीले पनि १० लाखभन्दा बढी सवारीसाधन रिकल गरेको छ। प्रशासनले सार्वजनिक गरेको विवरणअनुसार, सफ्टवेयर त्रुटिका कारण रिभर्स गर्दा रियरभ्यु क्यामेरा फ्रिज हुने वा कालो स्क्रिन देखिने समस्या देखिएको छ, जसले चालक र यात्रुको सुरक्षामा जोखिम पैदा गर्न सक्छ।
उबर चालकहरूलाई विशेष चेतावनी
उबर टेक्नोलोजीहरूले पनि आफ्ना चालकहरूलाई सम्झाउँदै भनेको छ कि उबर सँगको सम्झौता र सामुदायिक निर्देशिकाहरू अनुसार चालकहरूले आफ्नो सवारीसाधन सधैँ राम्रो अवस्थामा राख्नुपर्ने हुन्छ। निर्माता कम्पनीद्वारा घोषणा गरिएका रिकल भएका पार्टहरू समयमै मर्मत नगरेमा सेवा सञ्चालनमा समस्या आउन सक्ने उल्लेख गरिएको छ।
भीन खोजमा नदेखिए पनि पुनः जाँच गर्न सुझाव
प्रशासनले केही सवारीसाधनहरू हाल भीन खोज गर्दा रिकलबाट प्रभावित नदेखिन पनि सक्ने जनाएको छ। त्यसैले चालकहरूलाई समय–समयमा पुनः जाँच गर्न, रिकल अलर्टमा दर्ता हुन र सवारीसाधन दर्तामा रहेको ठेगाना अद्यावधिक राख्न आग्रह गरिएको छ।
सुरक्षित यात्राका लागि सवारीसाधनको नियमित जाँच र रिकल मर्मत अत्यन्त आवश्यक रहेको सेफ्टी एड्मिनिस्ट्रेशनको निष्कर्ष छ।
एआई फोटो
