पुनः सडकमा आउने लघुवित्तपीडितको चेतावनी
काठमाडौं । लघुवित्तहरुले गाउँगाउँमा पीडितहरुमाथि ज्यादती बढाएको भन्दै संघर्ष समितिले सरकारसँगको सहमति भंग गरेर पुनः सडकमा जाने चेतावनी दिएको छ ।
मंगलबार राजधनीको संवाद डबलीमा लघुवित्त तथा वित्तीय शोषणविरुद्धको संघर्ष समितिले पत्रकार सम्मेलन गर्दै सरकार आफूहरुप्रति सकारात्मक हुँदा पनि राष्ट्र बैंक वित्तीय माफियाको पक्षमा रहेकोसमेत आरोप लगाएको छ ।
समितिका अध्यक्ष मनिराम ज्ञवालीले सरकारसँग सहमति भएपछि पीडितहरुले न्याय पाउने विश्वास लिए पनि पुनः लघुवित्तहरुले गाउँ गाउँमा छिरेर अत्याचार बढाएको भन्दै आक्रोस व्यक्त गरे ।
निषेधित क्षेत्र तोडेर आफूहरु संसद भवन छिरेर शान्तिपूर्ण आन्दोलनलाई उत्कर्षमा पु¥याएको इतिहास रहेको उल्लेख गर्दै उनले भने,‘सरकार हाम्रा मागमा सकारात्मक छ, राष्ट्र बैंकका गभर्नर माफियाको संरक्षक भए तिनलाई पनि त्यहीँ घेर्ने दिन नआओस् ।’
लामो समयदेखि आन्दोलित आफूहरुको मागलाई हल्का लिए कुनै पनि समयमा सहमति तोडेर सडक तताउने र निर्णायक आन्दोलन गर्ने चेतावनीसमेत ज्ञवालीले दिए ।
समितिका सचिव रमेश तामाङले लघुवित्तबाट देशमा ४० लाख ऋणी र ६० लाख पीडित रहेको जनाउँदै सरकारले जसरी पनि न्याय दिनुपर्ने बताए । पछिल्लो समयमा लघुवित्तहरुले सरकारसँगको सहमतिलाई चुनौती दिदै गाउँगाउँ छिरेर पीडितमाथि ज्यादती बढाएकोप्रति अक्रोशित हुँदै उनले भने,‘लघुवित्तका झोलेहरुलाई कुकुरलाई जसरी खेदाउन हामीले सरकारसँग सहमति गरेर आन्दोलन टुंग्याएका छैनौं ।’
संघर्ष समितिका राष्ट्रिय स्वयमसेवक विभागका प्रमुख रमेश सेन्चुरीले सरकारसँग सहमति गरेर आफूहरुले अनैतिक सम्झौता नगरेको प्रष्ट्याए ।
उनले भने, ‘लाखौं–लाखको जीवनको सवालको विषयमा त्यसै आन्दोलन छाड्ने कुरा छैन, पीडितले न्याय नपाउन्जेल लड्ने हो ।’