मे २९, २०२३

मधेशी एशोशिएशन अफ अमेरिकामा नयाँ नेतृत्व, डा.संगीत रौनियार बने अध्यक्ष

फिलाडेल्फिया, अमेरिका / मधेशी एशोशिएशन अफ अमेरिका(मा)ले नयाँ नेतृत्व पाएको छ। अमेरिकाको पेन्सिलभेनिया राज्यको फिलाडेल्फियामा आइतवार सम्पन्न अधिवेशनले डा. संगीत रौनियारको नेतृत्वमा नयाँ कार्यसमिति निर्विरोध चयन गरेको हो।

२९ सदस्यीय मा को कार्यसमितिको बरिष्ठ उपाध्यक्षमा मनोज सिंह र महासचिवमा श्रीमती शाही साह निर्विरोध भएका छन्। आठ जना उपाध्यक्ष रहेको कार्यसिमतिको कार्यकाल दुई वर्षको हुने छ।

अध्यक्षमा निर्विरोध डा. रौनियार संस्थापन महासचिव तथा निवर्तमान बरिष्ठ उपाध्यक्ष हुन्। हाल अमेरिकाको टेक्सास निवासी डा. रौनियार पेशाले स्टक्चर इन्जिनियर हुन्।

नेपालमा सप्तरी पत्तेपुरका डा. रौनियार एक दशक भन्दा बढी समय देखि अमेरिकामा छन्। नेपालमा पुल्चोक इन्जिनयरिङ्गबाट ब्याचलर गरेका रौनियारले मास्टर्स र पीएचडी अमेरिकाको युनिभर्सिटी अफ टेक्सास आलेन्टनबाट गरेका हुन्।

डा. रौनियारले नयाँ पुस्ताका लागि भाषा र संस्कृतिको क्षेत्रमा आफ्नो कार्यसमितिले काम गर्ने मुल्य लक्ष्य बनाएको बताए ।

‘नयाँ पुस्तामा भाषा र सांस्कृतिको प्रवर्द्धन गर्ने’ मुख्य काम हुने छ, अध्यक्षमा निर्वाचित भए पछस समाज टाइम्स सँग डा. रौनियारले भने,’युवा पुस्तामा नेतृत्व विकास गर्ने कार्यक्रम पहिला पनि थियो, त्यसलाई सबैले मन पराएका छन् हामी निरन्तरता दिन्छौ।’

नवनिर्वाचित अध्यक्ष डा. रौनियारले च्याप्टर विस्तारमा पनि आफुहरुले विषेश पहल गर्ने बताए। मा मा अहिले १५ च्याप्टर छन्। सन् २०१७ को जनवरीमा स्थापना भएको संस्थाको अधिवेशन पारिवारिक वातावरणमा बौद्धिक व्यक्तित्वको उपस्थितिमा हुँदै आएको छ।

अध्यक्ष डा. रौनियारका अनुसार माँमा अहिले नौ सय भन्दा बढी सदस्य छन्। फिलाडेल्फियामा भएको अधिवेशनमा तीन सय भन्दा बढीले सहभागिता जनाएका थिए।

यस अघि आइतवार बिहान अमेरिकाको न्यूयोर्कस्थित नेपालको महावाणिज्य दूतावासमा कार्यवाहक महावाणिज्य दूत बिष्णु प्रसाद गौतमले अधिवेशनको उद्घाटन गरेका थिए।

उद्धाटन समारोहमा नेपालीमूलका पहिलो अमेरिकन डेलिगेड डा. ह्यारि भण्डारी, गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (आइसीसीका) कोषाध्यक्ष तथा एनआरएनए अमेरिका निवर्तमान अध्यक्ष तथा मा का संस्थापक अध्यक्ष सुनिल शाह लगायतले शुभ कामना दिएका थिए।