नेपाली कम्युनिष्ट पार्टीप्रति ओलीको आलोचना : वामपन्थी विचारबाट पतन भएकाहरूको एकता

काठमाडौं । नेकपा एमालेका अध्यक्ष केपी ओलीले वामपन्थी विचारबाट झरिसकेका र पतन भइसकेकाहरूले नेपाली कम्युनिष्ट पार्टीका नाममा एकता गरेको बताएका छन् । 

शुक्रबार नेसनल भोलेन्टियर फोर्सको घोषणा सभालाई सम्बोधन गर्दै उनले  वामपन्थीबाट र वामपन्थी विचारबाट पतन भइसकेका, उद्देश्यबाट र आचरणबाट कुहिइसकेकालाई एमालेमा कुनै स्थान नरहेको बताए । 

उनले भने,‘पार्टी सबभन्दा मजबुद बनाउन त्यति सजिलो छैन् । केही मान्छेहरू छन् बाम एकता भनेर घाँटी बसुन्जेल कराएका छन् । हामी सधैँ त्यसरी वाम एकता गर्दैनौँ । परेका बेला जाग्छौँ । वामपन्थीबाट झरिसकेका वामपन्थी विचारबाट पतन भइसकेका, उद्देश्यबाट र आचरणबाट कुहिइसकेकालाई एमालेमा कुनै स्थान छैन् ।’

त्यस्तै उनले स्वयंसेवक फोर्स राष्ट्रिय हितका लागि लोकतन्त्र र संविधानको रक्षा लागि गठन भएको बताए । नेकपा एमालेसँग असहमति राख्नेका लागि पनि जिउधनको रक्षा गर्ने काम र अधिकारको लागि फोर्स गठन भएको भन्दै यसको गठन र मजबुरीसँग कोही पनि तर्सिन नपर्ने उनको भनाई छ । 

उनले भने, ‘स्वयंसेवक फोर्स राष्ट्रिय हितका लागि, लोकतन्त्र र संविधानको रक्षा लागि गठन भएको हो । नेकपा एमालेसँग अथवा सङ्गठनसँग असहमति गर्नेका लागि पनि जिउधनको रक्षा र अधिकारको लागि गठन भएको हो । त्यसैले यसको गठन, विकास र मजबुरीसँग कोही पनि आत्तिनुपर्दैन, तर्सिनुपर्दैन ।’ 

अध्यक्ष ओलीले घर फर्क अभियानमार्फत नेकपा एसबाट एमालेमा फर्कनेहरूलाई महाधिवेशन प्रतिनिधि बनाउने निर्णय गरेको जानकारी गराए । 

‘हामीले अस्ति भर्खरै नेकपा एकीकृत समाजवादी बनाउन जानुभएकाहरु एमालेमा फर्केर आउनु भएको छ । ती मध्ये नेताहरूलाई हामीले महाधिवेशन प्रतिनिधि हुने विशेष निर्णय गरेको छौँ ।’

नेताहरूलाई युवा भेलामा जान नदिएर आक्रमणकारी र आतङ्क मच्चाउने काम  अहिलेसम्म जारी रहेको बताउँदै अध्यक्ष ओलीले त्यस्ता क्रियाकलाप तत्काल रोक्न सरकारलाई आग्रह गरे ।