निरंकुश सत्तालाई खरानी बनाएर जेनजीहरुले गुण लगाएर गए : विप्लव
काठमाडौं । नेपाल कम्युनिष्ट पार्टीका महासचिव नेत्र विक्रम चन्द विप्लवले जेन–जी आन्दोलनमा बलिदान गर्नेहरूले नेपाललाई कहिल्यै नबिर्सने गुण लगाएर गएको बताएका छन् ।
बिहीबार काठमाडौंमा आयोजित बृहत् जनसभालाई सम्बोधन गर्दै उनले अहङ्कारी सत्तालाई र संसद्लाई उठ्नै नसक्ने गरी थला पारेर, आगोलाई खरानी बनाइदिएर जेनजी आन्दोलनमा बलिदान गर्नेहरूले नेपाललाई कहिल्यै नबिर्सने गुण लगाएर गएको बताएका हुन् ।
उनले भने, ‘जेन–जी आन्दोलनमा बलिदान गर्नेहरूले नेपाललाई कहिल्यै नबिर्सने गुण लगाएर गएका छन् । नेपालको राज्यसत्ता अन्धो थियो, राज्यसत्ता बहिरो थियो, राज्यसत्ता निरंकुश थियो, राज्यसत्ता मूर्ख बन्दै गएको थियो । जनताविरुद्धमा तानाशाही बन्दै गएको थियो । हाम्रा जेन–जीले आफ्नो रगत दिएर, बलिदान गरेर अहङ्कारी सत्ता एवम् दलालहरू र संसद्लाई उठ्नै नसक्ने गरी थला पारेर आगोमा खरानी बनाइदिए । म ती शहीद र तिनका परिवारलाई सम्मान गर्न चाहन्छु ।’
जनयुद्धमा रगत बगाउने सर्वहाराको अपमान, त्यसको बेवास्ता गरिएको र स्वार्थको लागि संसदमा र्याल काटिरहेका बेला जेनजी आन्दोलन भएको उनको भनाई छ ।
