नयाँ संघीय नियमले आप्रवासी चालकहरूलाई असर, रोजगारी गुम्ने क्रम तीव्र
गोबिन्द गुरुङ
कार्लाल, पेन्सिलभेनिया / अमेरिकामा लागू गरिएको नयाँ संघीय नियमले सयौँ हजार आप्रवासी ट्रक चालकहरूलाई असर पारेको छ ।
व्यावसायिक चालक अनुमति पत्र (सीडिएल) रद्द गरिँदा विशेष गरी आइदाहो राज्यमा रोजगार गुम्ने चिन्ता बढेको छ ।
यो नियम आगामी मार्च १६ देखि ‘फेडेरल मोटर क्यारियर सेफ्टी एडमिनिस्ट्रेसन’द्वारा लागू गरिएको हो । नयाँ व्यवस्थाअनुसार एच-२ ए र एच-२ बी भिसा भएका कामदारहरूलाई मात्र (सीडिएल) मान्य हुनेछ ।
बाल्यकालमा अमेरिकामा ल्याइएका आप्रवासीहरूका लागि स्थगित कारबाही कार्यक्रम ‘डाका’ अन्तर्गत रहेका व्यक्तिहरू, शरण पाएका मानिसहरू र ‘टिपीएस’ भएका व्यक्तिहरूलाई यसमा समावेश गरिएको छैन ।
देशभर रहेका करिब २ लाख गैर–नागरिक (सीडिएल) धारकहरूमध्ये अब करिब १० हजार मात्र योग्य रहनेछन् ।
आप्रवासन वकिल निक्की रामिरेजले भने, “उनीहरूले आफ्नो काम गुमाइरहेका छन् किनभने अब उनीहरूसँग त्यो काम गर्न आवश्यक लाइसेन्स छैन।”
आइदाहो राज्यमा सांसदहरूले हाउस बिल ६६७ पास गरेका छन् । जसले (सीडिएल) को लागि अझ कडा मापदण्ड लागू गरेको छ । यस कानुनअनुसार आवेदकले राज्यको बसोबास प्रमाण र अमेरिकी नागरिकता वा सेभ प्रणालीमार्फत प्रमाणित कानुनी उपस्थितिको प्रमाण देखाउनुपर्छ ।
आइदाहो यातायात विभागले प्रभावित चालकहरूलाई उनीहरूको लाइसेन्स रद्द भएको जानकारी दिने पत्र पठाइसकेको छ । राज्यको नियमअनुसार सबै आवेदकहरूको पहिचान र कानुनी स्थिति प्रमाणित गर्न आवश्यक रहेको जनाइएको छ ।
