महिला टी–२० विश्वकप छनोट : नेपालको मैदानमा चम्किन सक्ने पाँच खेलाडी
काठमाडौं / आईसीसी महिला टी–२० विश्वकप छनोट प्रतियोगिता आइतबारबाट नेपालमा सुरु हुँदैछ। यस प्रतियोगितामा सहभागी १० टोलीले इंग्ल्यान्ड र वेल्समा हुने महिला टी–२० विश्वकप २०२६ का लागि चार अन्तिम स्थान सुरक्षित गर्न प्रतिस्पर्धा गर्नेछन्।
दाउ निकै उच्च रहेको यस छनोटमा सबै टोलीमा भरपूर क्षमता देखिन्छ, र प्रतियोगितामा विशेष प्रभाव पार्न सक्ने पाँच खेलाडीमाथि सबैको ध्यान केन्द्रित छ।
नेपालमा आयोजना हुन लागेको यो छनोट प्रतियोगिताका सबै खेलहरू ICC.tv मार्फत प्रत्यक्ष हेर्न सकिनेछ।
कीर्तिपुर र मुलपानीमा चम्कन सक्ने पाँच खेलाडीहरु
निगार सुल्ताना जोटी (बंगलादेश)
बंगलादेशकी कप्तान निगार सुल्ताना जोटी महिला क्रिकेटका उत्कृष्ट खेलाडीमध्ये एकका रूपमा चिनिन्छिन्। २८ वर्षीया जोटी हाल आईसीसी महिला टी–२० ब्याटिङ वरीयताको शीर्ष २० भित्र पर्छिन्।
गत वर्ष भारतमा आयोजना भएको आईसीसी महिला क्रिकेट विश्वकप छनोट प्रतियोगितामा उनी ‘टिम अफ द टुर्नामेन्ट’ मा परेकी थिइन्। उक्त प्रतियोगितामा उनले श्रीलंकाविरुद्ध ७७ रनको उत्कृष्ट पारी खेल्दै टोलीलाई अगुवाइ गरेकी थिइन्।
नेपालमा भएको अभ्यास खेलमा पनि जोटीले आफ्नो फर्म निरन्तरता दिँदै नामिबियाविरुद्ध अविजित ७५ रन बनाएकी छन्। बंगलादेशका लागि चौथो क्रममा ब्याटिङ गर्ने उनी यस छनोट प्रतियोगितामा पनि उत्कृष्ट प्रदर्शन गर्न तयार देखिन्छिन्।
ओर्ला प्रेन्डरगास्ट (आयरल्यान्ड)
आयरल्यान्डकी ओर्ला प्रेन्डरगास्ट महिला क्रिकेटकी प्रमुख अलराउन्डरमध्ये एकका रूपमा आफूलाई स्थापित गरिसकेकी छन्। हालैका प्रदर्शनले २३ वर्षीया प्रेन्डरगास्ट नेपालमा हुने छनोटमा चम्किन तयार रहेको संकेत दिएको छ।
उनले सन् २०२४ को आईसीसी महिला टी–२० टिम अफ द इयरमा स्थान बनाएकी थिइन्। त्यसपछि सन् २०२५ को अगस्टमा युरोप क्षेत्रमा भएको टी–२० विश्वकप छनोटमा ब्याट र बल दुवैमा उत्कृष्ट प्रदर्शन गरेपछि ‘आईसीसी महिला प्लेयर अफ द मन्थ’ को अवार्ड जितेकी थिइन्।
नेपाल र जिम्बाब्वेविरुद्ध भएका अभ्यास खेलमा उनले लगातार दुई अर्धशतक बनाएकी छन्, र छनोट प्रतियोगितामा पनि त्यस्तै प्रभावशाली प्रदर्शनको अपेक्षा गरिएको छ।
क्याथ्रिन ब्राइस (स्कटल्यान्ड)
यदि स्कटल्यान्ड लगातार दोस्रो पटक महिला टी–२० विश्वकपमा छनोट हुन सफल भयो भने त्यसको मुख्य श्रेय कप्तान क्याथ्रिन ब्राइसलाई जाने लगभग निश्चित छ।
२८ वर्षीया ब्राइसले पछिल्लो १२ महिनामा इंग्ल्यान्ड र अस्ट्रेलियाका घरेलु प्रतियोगितामा आफ्नो क्षमता प्रमाणित गरिसकेकी छन्। नेपालमा भएका अभ्यास खेलहरूमा पनि उनले ब्याटिङमा राम्रो योगदान दिनुका साथै बलिङतर्फ विकेटसमेत लिएकी छन्।
ब्राइस नेपालमा नयाँ बल सम्हाल्ने सम्भावना छ भने ब्याटिङमा पनि शीर्ष क्रममा खेल्नेछिन्। स्कटल्यान्डले आफ्नी प्रेरणादायी कप्तानबाट टोलीलाई अगाडि बढाउने आशा गरेको छ।
नत्ताकन चन्थाम (थाइल्यान्ड)
अनुभवी ब्याटर नत्ताकन चन्थाम थाइल्यान्डको महिला टोलीका मुख्य आधारमध्ये एक हुन्। सन् २०२० मा थाइल्यान्डले खेलेको एकमात्र महिला टी–२० विश्वकपमा उनी टोलीकी सर्वाधिक रन बनाउने खेलाडी थिइन्।
सिड्नीमा भएको सो प्रतियोगितामा उनले पाकिस्तानविरुद्ध प्रभावशाली अर्धशतक प्रहार गरेकी थिइन्। पछिल्लो समय उनी उत्कृष्ट लयमा देखिएकी छन्, गत वर्षको अन्त्यतिर बैंककमा सिंगापुरविरुद्ध १४८ रनको विशाल पारी खेलेकी थिइन्।
यद्यपि छनोटअघिका अभ्यास खेलमा उनले ३० र ७ रन मात्रै बनाइन्, तर ठूला मञ्चमा उत्कृष्ट प्रदर्शन गर्ने क्षमताका कारण चन्थाममाथि सबैको नजर रहनेछ।
कोनियो ओआला (पपुवा न्युगिनी)
पपुवा न्युगिनीकी ओपनर कोनियो ओआलाले अहिलेसम्म अन्तर्राष्ट्रिय स्तरमा १९ खेल मात्रै खेलेकी छन्, तर छोटो समयमै उनी ‘म्याच–विनर’ को रूपमा परिचित हुँदै गएकी छन्।
गत वर्ष भएको आईसीसी महिला टी–२० विश्वकप इस्ट एसिया–प्यासिफिक छनोटमा उनले ७१ बलमा अविजित १३० रनको विस्फोटक पारी खेलेकी थिइन्। नेपालमा जिम्बाब्वेविरुद्ध भएको अभ्यास खेलमा उनले ७१ रन बनाउँदा सात छक्का प्रहार गरेकी थिइन्, जसले सबैको ध्यान तानेको थियो।
त्यसै लयलाई निरन्तरता दिन सके कोनियो ओआलाबाट नेपालमा हुने छनोट प्रतियोगितामा अझ धेरै आकर्षक प्रदर्शनको अपेक्षा गरिएको छ।
