नेप्सेमा सामान्य वृद्धि, कारोबार रकममा गिरावट
काठमाडौँ । नेपाल स्टक एक्सचेन्ज (नेप्से) परिसूचक सामान्य अङ्कले बढेर बन्द भएको छ । यसअघि मङ्गलवार को बढ्दो क्रमलाई निरन्तरता दिँदै बुधवार नेप्से १.३७ अङ्कले बढेर २५८५.८७ विन्दुमा उक्लेको हो ।
यस दिन सेन्सेटिभ इण्डेक्स ०.९४ अङ्कले बढेको छ भने फ्लोट इण्डेक्स ०.१७ अंक र सेन्सेटिभ फ्लोट इण्डेक्स ०.४६ अङ्कले बढेको छ । यस दिन नेप्सेमा सामान्य सुधार देखिए पनि कारोबार रकममा भने अघिल्लो दिनको तुलनामा गिरावट आएको छ ।
मङ्गलवार ३ अर्ब ४२ करोड रुपैयाँ बराबरको कारोबार भएको बजारमा यस दिन भने ३३४ स्टकको ३ अर्ब २२ करोड ४६ लाख ६४ हजार रुपैयाँ बराबरको ७२ लाख २४ हजार कित्ता शेयर खरिदबिक्री भएको छ ।
यस दिन इन्फिनिटी लघुवित्त वित्तीय संस्थाको शेयर मूल्य सर्वाधिक ५.३२ प्रतिशतले बढेको छ । त्यसै गरी, नेशनल हाइड्रोपावर कम्पनी र हिम स्टार ऊर्जा कम्पनीको शेयर मूल्य ४ प्रतिशतभन्दा बढीले उकालो लागेको छ । अधिकांश अन्य स्टकहरूको मूल्य वृद्धिदर भने ४ प्रतिशतभन्दा कम रहेको छ।
त्यस्तै, यस दिन ग्रामीण विकास लघुवित्त वित्तीय संस्था र कर्पोरेट डेभलपमेन्ट बैङ्कको शेयर मूल्य सबैभन्दा धेरै घटेको छ । यस दिन यो कम्पनीको शेयर मूल्य ४ प्रतिशतभन्दा बढीले घटेको छ ।
आज कारोबारमा आएका कम्पनी मध्ये कारोबार रकमका आधारमा एसवाई प्यानल नेपाल पहिलो स्थानमा रहेको छ । सो कम्पनीको बुधवार १४ करोड ४९ लाख रुपैयाँ बराबरको शेयर कारोबार भएको छ । यस्तै, मञ्जुश्री फाइनान्सको साढे १२ करोड रुपैयाँभन्दा बढीको शेयर किनबेच भएको छ ।
उपसमूहगत रुपमा हेर्दा १३ उपसमूहमध्ये ६ उपसमूहको परिसूचक बढेको छ भने ७ उपसमूहको परिसूचक घटेको छ । बैंकिङ्ग, होटल तथा पर्यटन, उत्पादन तथा प्रशोधन, म्युचुअल फण्ड, निर्जीवन बीमा र व्यापार उपसमूहको परिसूचक सामान्य अङ्कले बढेका छन् ।
बाँकी उपसमूहमा भने गिरावट देखिएको छ । समग्रमा बजारमा सीमित सुधार देखिए पनि कारोबार रकम घटेकाले लगानीकर्ता अझै पर्ख र हेरको अवस्थामा रहेको सङ्केत मिल्छ ।
