डेलावेयर पुगेर राष्ट्रपति बाइडेनले गरे मतदान

पेन्सिल्भेनिया । अमेरिकी राष्ट्रपति जो बाइडेनले डेलावेयरमा पुगेर आगामी राष्ट्रपतीय निर्वाचनको प्रारम्भिक मतदान गरेका छन्। तर, यो पटक उनले आफ्ना लागि होइन, उपराष्ट्रपति कमला ह्यारिसलाई समर्थन गर्दै मतदान गरेका हुन्।

राजनीतिक क्षेत्रमा आधा शताब्दी बिताएका बाइडेनले आफ्नो नाममा यस पटक मतदान गर्न नपाए पनि आफ्ना उत्तराधिकारीका रूपमा ह्यारिसलाई समर्थन गर्न पाउँदा गर्व लागेको बताएका छन्।

साधारण कार्यक्रमका रूपमा मतदान केन्द्र पुगेका बाइडेनले अन्य नागरिकहरूसँग ३७ मिनेट लाइनमा बसेर कुराकानी गरेका थिए। उनले एक वृद्ध महिलालाई व्हीलचेयरमा धकेल्दै सहयोग पुर्याए, कसैको फोनमा कुरा गरे, सँगैका एक बच्चासँग फोटो खिचाए, र केही जोक पनि सुनाए। लाइनमा केही विरोधीहरू पनि उपस्थित थिए, तर अधिकांशले बाइडेनको उपस्थिति मन पराएका थिए।

जब मतदान गर्न उनको पालो आयो, उनले आफ्नो फोटो आईडी निकालेर मतदान गरे र “आई भोटेड” स्टिकर लगाउँदै मतदान केन्द्रबाट बाहिर निस्किए। मतदान केन्द्रबाहिर सञ्चारकर्मीहरूले यो क्षण उनलाई तितोमिठो लागेको हो कि भन्ने प्रश्न गर्दा बाइडेनले मुस्कुराउँदै भने, “मलाई यो मात्र मिठो लागेको छ।”

निर्वाचन आउन अब एक साता बाँकी छ, तर बाइडेनको क्याम्पेन गतिविधि अपेक्षाकृत कम देखिएको छ। उनले यसअघि ह्यारिसको लागि क्याम्पेन ट्रेलमा सक्रिय रहने बताएका भए पनि अन्तिम क्षणमा भने उनी धेरैजसो कार्यक्रममा उपस्थित भएका छैनन्।

केही क्याम्पेन कल र शुक्रवार फिलाडेल्फियामा युनियन कार्यक्रममा सहभागी हुने योजना छ, तर यो पनि ह्यारिसको क्याम्पेन भन्दा आधिकारिक कार्यक्रमका रूपमा मानिएको छ।

बाइडेनले पिट्सबर्गमा भएको “गेट-आउट-द-भोट” कार्यक्रममा सम्बोधन गर्दै आफ्नो राजनीतिक यात्राको अन्त्य नजिक रहेको संकेत गरे। सम्बोधनको क्रममा उनले भने, “हामीसँग अझै धेरै काम बाँकी छ, कमला र मसँग।” तर तुरुन्तै संशोधन गर्दै भने, “कमलासँग।”

बाइडेनलाई थाहा छ कि यो चुनावको नतिजाले उनको राजनीतिक भविष्यको मूल्यांकनमा महत्वपूर्ण भूमिका खेल्नेछ। ह्यारिस विजयी भएमा उनको उत्तराधिकार सफल मानिनेछ, तर हार भएमा आलोचनाले उनलाई पछ्याउने सम्भावना छ। मतदानपछि उनलाई ह्यारिसको जितबारे प्रश्न गर्दा बाइडेनले आत्मविश्वाससाथ भने, “मलाई लाग्छ, हामी जित्छौँ।”