गौशाला धर्मशाला विवादः पर्यटनमन्त्रीद्वारा परिषद् बैठक आह्वान

काठमाडौँ। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले गौशाला धर्मशाला सम्बन्धी विवाद समाधान गर्न पशुपति क्षेत्र विकास कोषको बैठक आह्वान गरेका छन्। साथै, उनले धर्मशालासम्बन्धी कुनै पनि काम नगर्न कोषलाई निर्देशन दिएका छन्।

पशुपति क्षेत्र विकास कोषका अध्यक्षसमेत रहेका मन्त्री पाण्डेले असोज ३० गते ‘शान्ति सुरक्षामा समस्या उत्पन्न भएको’ भन्दै कोषलाई पत्राचार गरी गौशाला धर्मशाला खाली गराउने काम रोक्न निर्देशन दिएका हुन्। कोषका प्रवक्ता रेवतीरमण अधिकारीका अनुसार, मन्त्री पाण्डेले कात्तिक ४ गते परिषद् बैठक संस्कृति, पर्यटन तथा नागरिक उड्डयन मन्त्रालयमा आह्वान गरेका छन्।

धर्मशालासम्बन्धी विवाद तब सुरु भयो जब कोषले आफ्नो पूर्ण स्वामित्वमा रहेको सम्पत्ति धर्मशालालाई कुनै व्यक्ति वा व्यापारिक समूहलाई सञ्चालन गर्न नदिने र बरु गैरनाफामूलक ढंगले काठमाडौँ महानगरपालिकासँगको सहकार्यमा सञ्चालन गर्ने घोषणा गरेको थियो।
यसअघि धर्मशाला सञ्चालन गर्न इच्छुक मारवाडी सेवा समितिले कोषको यस निर्णयको विरोध गरेको थियो।