‘एनआरएनए नागरिकताका समस्या समाधान गर्ने गृहमन्त्रीको प्रतिबद्धता’

काठमाडौ/ गृहमन्त्री रमेश लेखकले सरकारले गैर आवासीय नेपाली नागरिकताको कार्यान्वयनमा देखा परेका समस्या समाधान गर्दै सम्बन्धित निकायमा छिट्टै आवश्यक परिपत्र गर्ने प्रतिबद्धता जनाएको बताइएको छ।

गैर आवासीय नेपाली संघ (एनआरएनए) डा. बद्री केसी समुहको पहलमा गैर आवासीय नेपाली नागरिकताको पूर्ण कार्यान्वयनका सम्बन्धमा काठमाडौैमा भएको विशेष अन्तरक्रिया कार्यक्रम गृहमन्त्री लेखकले सो प्रतिबद्धता जनाएको जनाइएको छ।

डा बद्री केसी अध्यक्ष रहेको समूहको समुहको सचिवालयद्वारा जारी विज्ञप्ति अनुसार कार्यक्रममा गृहमन्त्री लेखक, संविधानसभा सदस्यहरू वरिष्ठ अधिवक्ता राधेश्याम अधिकारी, डा. खिमलाल देवकोटा, राष्ट्रिय सभाका पूर्व सदस्य राम नारायण बिडारी र पूर्व महान्यायाधिवक्ता अग्नि प्रसाद खरेललाई आमन्त्रण गरिएको थियो।

विज्ञप्ति अनुसार सरकारले आर्थिक, सामाजिक र सांस्कृतिक अधिकारसहित नागरिकताको व्यवस्था गरेता पनि अझै उक्त अधिकार प्राप्त हुन नसकेको भन्दै ध्यानाकर्षण गराइएको थियो ।

कार्यक्रममा अध्यक्ष डा केसीले ठुलो सङ्घर्षपछि सरकारले नागरिकता प्राप्तिको लागि बाटो खुला गरेको भए पनि सम्बन्धित निकायमा समयमै परिपत्र नहुँदा समस्या भोग्नुपरेको जनाकारी गराएका थिए।

‘संविधानतः गैर आवासीय नेपालीहरूले नागरिकता प्राप्त गरिरहेको भए पनि त्यसमा उल्लेखित अधिकारहरू प्राप्त भएका छैनन् । गैर आवासीय नेपाली नागरिकता लिने क्रममा सम्बन्धित निकायहरूमा अझ केही अस्पष्टता देखिएकोले नागरिकता लिनको लागि समस्या भएको छ भने नागरिकता प्राप्त गरिसकेपछि पनि सामाजिक, सांस्कृतिक र आर्थिक अधिकारको पूर्ण प्रयोग गर्न पाइएको छैन।’ विज्ञप्तिमा भनिएको छ।

अन्तरक्रियामा नेपालको विद्यमान कानुनमा रहेका समस्याहरू, कानुन तथा नियमावली संशोधनका उपायहरू तथा अध्यागमन, मालपोत, बैंक तथा अन्य व्यवहारिक ठाउँका समस्या तुरुन्त समाधानका लागि बृहत् छलफल गरिएको विज्ञप्तिमा उल्लेख छ।

कार्यक्रममा केसीसहित, उपमहासचिव सोम सापकोटा, सह कोषाध्यक्ष कृष्ण तिमिल्सेना, एसिया प्यासिफिक क्षेत्रीय संयोजक हरि भट्टराई, सल्लाहकार अतुल कोइराला, संस्थापक अन्तर्राष्ट्रिय संयोजक भीम उदास, पूर्व उपाध्यक्ष (एनसीसी बेल्जियम) तीर्थ धमला, प्रमुख कार्यकारी अधिकृत राजेन्द्र कुमार राउत अधिकृत कुनाल मिश्र,संघका तर्फबाट गैर आवासीय नेपाली नागरिकताका फोकलपर्शन सरोज दाहाल लगायतको उपस्थिति रहेको जनाइएको छ।