नयाँ कर नीतिप्रति पुँजिबजार लगानीकर्ता असन्तुष्ट  थप आन्दोलनको घोषणा

काठमाडौं । नीति तथा कार्यक्रममार्फत ल्याइएको नयाँ कर नीतिको पुँजिबजारका लगानीकर्ताले विरोध गरेका छन् ।

सरकारले ल्याएको आयकर बढाउने नीतिलाई स्वीकार्न नसकिने भन्दै आन्दोलन थालेका उनीहरुले  आज माइतीघरमा विरोध प्रर्दशन गरेका छन् ।

विरोध कार्यक्रममा पुँजिबजार सुधारका अभियान्ता तिलक कोइरालाले सरकारले पुँजि बजार मारा नीति ल्याएको भन्दै चर्को आपत्ति जनाए । ‘हाम्रो बेहाल हुन्छ, अहिले पुँजीबजार मारा नीति ल्याएर पुँजीबजारलाईै थला पारेर यो बजार वर्षौ उठ्दैन् । ’

अर्थमन्त्रीले शेयर मार्केटबारे दिएको अभिव्यक्तिप्रति पनि उनले असन्तुष्टि पोखे । ‘अर्थमन्त्रीले भनेको ९९ प्रतिशतको कुरा होईन्, यो १ सय प्रतिशतको कुरा हो ।’ उनले भने ‘पुँजीबजार जागिर खाए जस्तो होईन्, जागिरमा महिना मरेपछि पैसा आउँछ कर काटिन्छ, तर पुँजीबजार जोखिमको ठाँउ हो । यहाँ लगानि गरेर आम्दानी हुने होईन् गुमाउने सम्भावना छ । कमाउनको लागि यो स्थानमा धेरै काम गर्नुपर्छ । ’

शेयर बजारमा यसअघिको भन्दा थप एक रुपैयाँ पनि कर तिर्न नसकिने उनको तर्क छ । उनले भने ‘यस्तो स्थानमा हामीले काम गरिरहेका छौ, यस्तो स्थानमा सबैभन्दा चर्को कर लगाएर हामीलाई निरुत्साहित गरियो भने, हामी त भाग्छौ नै तर नयाँ आउने पनि कोही टिक्दैन् ।  आईपीओ बिक्दैन् बजार खतम भएर जान्छ । सरकारले १ रुपैयाँ पनि कर उठाउन सक्दैन् यो स्थानबाट ।’

उनले पर्सी आइतबार अर्थमन्त्रीको घर घेराउ तथा कारोबार रोक्ने लगायतका आन्दोलन गर्ने समेत चेतावनी दिएका छन् ।