ट्रम्प र जापानी प्रधानमन्त्री ताकाइचीबीच व्यापार र दुर्लभ खनिज सम्बन्धी दुई महत्त्वपूर्ण सम्झौतामा हस्ताक्षर
जापान । अमेरिकी राष्ट्रपति डोनाल्ड ट्रम्प र जापानकी प्रधानमन्त्री साने ताकाइचीबीच मंगलबार दुई वटा महत्त्वपूर्ण द्विपक्षीय सम्झौता सम्पन्न भएको छन् । एक सम्झौता व्यापारसँग सम्बन्धित छ भने अर्को दुर्लभ र महत्त्वपूर्ण खनिजको आपूर्ति सुदृढ गर्न केन्द्रित छ ।
पहिलो सम्झौतामा ‘अमेरिका–जापान गठबन्धनको नयाँ सुनौलो युग’को घोषणा गरिएको छ । यस सम्झौताअनुसार जापानी लगानीकर्ताले अमेरिकामा करिब ५५० अर्ब अमेरिकी डलर बराबरको लगानी गर्नेछन् । बदलामा अमेरिकी पक्षले जापानी निर्यातमा १५ प्रतिशत कर लागू गर्ने व्यवस्था गरेको छ ।
दोस्रो सम्झौताले दुर्लभ र महत्त्वपूर्ण खनिजको खानी र प्रशोधन क्षेत्रमा सहकार्य बढाउने ढाँचा तयार गरेको छ । यो सम्झौताको उद्देश्य अत्यावश्यक सामग्रीको आपूर्ति शृङ्खलालाई मजबुत बनाउँदै इलेक्ट्रोनिक्स र प्रविधि उत्पादनमा आवश्यक कच्चा पदार्थको उपलब्धता सुनिश्चित गर्नु हो ।
यी सम्झौताहरू सोमबार टोकियोको आकासाका प्यालेसमा भएको ट्रम्प र ताकाइचीबीचको द्विपक्षीय बैठकपछि हस्ताक्षर गरिएको हो । उक्त बैठकले दुवै देशबिचको रणनीतिक र आर्थिक साझेदारीलाई थप बलियो बनाएको जापानी सञ्चारमाध्यमले जनाएका छन् ।
प्रधानमन्त्री ताकाइचीले भेटपछि भनिन्, ‘हामी अमेरिका–जापान सम्बन्धलाई नयाँ सुनौलो युगतर्फ लैजानेछौ । यो संसारकै महानतम् गठबन्धन हो ।’
उनले पश्चिम एसियामा शान्ति प्रवर्द्धन र थाइल्यान्ड–क्याम्बोडियाबीचको विवाद समाधानमा ट्रम्पको भूमिकाको पनि प्रशंसा गर्दै ‘अभूतपूर्व ऐतिहासिक उपलब्धि’ भनेकी छन् ।
सम्झौता हस्ताक्षरपछि आकासाका प्यालेसमा स्वागत समारोह आयोजित गरिएको थियो, जहाँ ट्रम्प र ताकाइचीले सम्मान गार्ड अवलोकन गर्दै अधिकारीहरूसँग भेटघाट गरेका थिए । समारोहले वासिङ्टन र टोकियोबिच बढ्दो मित्रता र सहकार्यलाई प्रतीकात्मक रूपमा झल्काएको थियो ।
कार्यक्रममा अमेरिकी विदेश मन्त्री मार्को रुबियो, कोष मन्त्री स्कट बेसन्ट, वाणिज्य मन्त्री हार्वर्ड लुटनिक, अमेरिकी व्यापार प्रतिनिधि, र ह्वाइट हाउस प्रेस सेक्रेटरी क्यारोलिन लेभिट पनि सहभागी थिए ।
ट्रम्पको जापान भ्रमण उनले सोमबार सम्राट नारुहितोसँग गरेको भेटपछि सुरु भएको हो । सो अवसरमा उनले सम्राट्लाई ‘महान् व्यक्ति’ भन्दै सम्मान व्यक्त गरेका थिए । ट्रम्पको यो भ्रमण पाँच दिने एसियाली दौरा अन्तर्गतको दोस्रो गन्तव्य हो । यसअघि उनले मलेसियामा सम्पन्न ४७ औँ आसियान शिखर सम्मेलनमा सहभागी हुँदै क्याम्बोडिया–थाइल्यान्ड शान्ति सम्झौतामा हस्ताक्षर गरेका थिए ।
एएनआई
