रास्वपाका २१ सांसदले २१ आयोजनामा पैदल यात्रा गर्ने
काठमाडौँ । राष्ट्रिय स्वतन्त्र पार्टीका २१ जना सांसदले मुलुकका २१ वटा आयोजनाहरूमा पैदल यात्रा गर्ने भएका छन् । यो घोषणा पार्टीद्वारा शनिवार राजधानीमा आयोजित समारोहमा सभापति रवी लामिछानेले गरेका हुन् ।
पार्टीको एक वर्षको गतिविधि सार्वजनिक करण कार्यक्रममा उनले २१ जना सांसदको भागमा एउटा–एउटा आयोजना दिइने र ती अधुरो हुनुको कारण खोजेर सरकारलाई समाधान पत्र सरकारलाई बुझाउने बताए ।
‘लामो समयदेखि नबनेका आयोजनाहरूको एउटा होइन, २१ वटा आयोजनाहरूमा पैदल यात्रा सुरुवात गर्ने छौ । २१ जना सांसदको भागमा एउटा–एउटा आयोजना दिएर दबाब यात्रा गरेर समाधानसहित ज्ञापन पत्र होइन, समाधान पत्र सरकारलाई दिएर त्यो नबनेसम्म खबरदारी गर्ने, मिसन ८० को बारेमा आज म सार्वजनिक गर्न पाउँदा गौरव अनुभव गरेको छु,’ उनले भने ।
देशमा एउटा बाटो बन्न एउटा पुस्ताले कुर्नुपर्ने अवस्थाको अन्त्य हुनुपर्ने भन्दै सबैको साथ हुने हो भने सदनलाई जनताको सदन बनाउने उनले बताए ।
रास्वपा गठनदेखि नै प्रदेश सभा सम्बन्धी व्यवस्थाबारे विमति राख्दै आएका लामिछानेले शनिवार पनि त्यसबारे भन्न छुटाएनन् । प्रदेश सभा मुलुकलाई चुस्ने र दलका भाग नपाएकाहरूलाई भाग दिने ठाउँ भएको भन्दै उनले प्रदेशको यो संरचना व्यवस्थाको लागि सबैभन्दा बढी चुनौती भएको आरोप लगाए ।
उनले भने, ‘प्रदेश सभा नेपाललाई चुस्ने र दलका भाग नपाएकाहरूलाई भाग दिने ठाउँ कसले बनायो उनीहरूलाई हाम्रो प्रश्न हो । त्यस कारण प्रदेशप्रति गम्भीर रूपमा सोच्नुपर्ने अवस्था सिर्जना भएको छ । प्रदेशको यो संरचना र यही तरिकाको कानुन नबन्ने हो भने व्यवस्थाको लागि यो सबैभन्दा बढी चुनौती हुन्छ । हाम्रो मिसन चौरासी भनेको योग्य मानिसलाई खोज्ने र योग्यता अनुसारको काम दिने नै हो ।’
मिसन ८४ आफूहरूको मात्रै नभएर सुशासन चाहने सबैको भएको उनले बताए । नेपाली राजनीतिमा टिकिरहन सुधारका कामहरू गरेर अगाडि बढ्नुपर्नेमा नेताहरूमा त्यस्तो नदेखिएको उनले कटाक्ष गरे ।
‘अहिलेका पुराना दलहरू शासन सत्ता हामी हो, हामी जुटिहाल्छौ, केही भएन भने झेली गरेर गठबन्धन गरेर पनि जितिहाल्छौँ भन्छन्,’ उनले भने, ‘त्यो आत्मविश्वास भएर होला, राष्ट्रपतिले चुन्नका लागि राखिएको सङ्ख्यामा पनि भर्खरै चुनाव हारेको मान्छेलाई लिएर जानु पर्यो, यो व्यवस्थामा त्यति खतरा कोबाट छ । कसले यो व्यवस्थालाई खतरा गर्यो, परिवर्तनमाथि प्रहार कसले गर्यो, जसले अनुसन्धान हुँदाहुँदैको फाइल बन्द गर्यो, त्यसैले गर्यो ।’
भ्रष्टाचार, ठगी, अन्याय, देशमा मात्रै नभई नेपालीले विदेशमा पनि भोग्नुपरेको उनले बताए । ‘ठगीमा पर्नु पनि सामान्य कुरा बनाएर समाजले हरेक अपराध र बेथितिलाई सामान्यीकरण गर्दै यसैमा बाँच्ने बानी पारिरहेको समयमा हामी घण्टी बजाउँदै निस्किएका हौँ,’ उनले भने, ‘राजनीतिमा कुन हदसम्म गिरेर, अरूलाई गिराउने काम हुन्छ भन्ने कुरा हामीलाई थाहा भएको हुनाले पनि हामी डराएका छैनौँ ।’
निरन्तर प्रहार भइरहे पनि नडराउने उद्घोष उनको थियो । ‘हामीलाई हार्ने छुट छैन, हामीमाथि जस्तो किसिमको टीकाटिप्पणीको आक्रमण भइरहेको छ, त्यसबाट हामी हार मान्ने वाला छैनौँ,’ उनले भने, ‘हामीलाई राजनीति आउँदैन भन्ने गरेको छ । त्यो हो, हामीलाई आउँदैन र यो राजनीति तपाईँहरूसँगै सकियोस् कामना छ ।’
