आईसीसी महिला टी–२० विश्वकप २०२६ छनोट: अमेरिका सहित १० मुलुक नेपालमा, चार स्थानका लागि निर्णायक भिडन्त
काठमाडौं / आईसीसी महिला टी–२० विश्वकप २०२६ का लागि चार अन्तिम स्थान टुंगो लगाउने छनोट प्रतियोगिता नेपालमा सुरु हुँदैछ।
जनवरी १८ देखि फेब्रुअरी १ सम्म चल्ने यस प्रतियोगितामा विश्वका १० महिला राष्ट्रिय टोली सहभागी हुनेछन्। इंग्ल्यान्ड र वेल्समा आयोजना हुने मुख्य विश्वकपमा स्थान बनाउने लक्ष्यसहित टोलीहरू नेपाल आएका हुन्।
काठमाडौंका दुई अन्तर्राष्ट्रिय क्रिकेट मैदान—१४ हजार दर्शक क्षमताको त्रिभुवन विश्वविद्यालय अन्तर्राष्ट्रिय क्रिकेट मैदान (कीर्तिपुर) र ५ हजार दर्शक अटाउने मुलपानी अन्तर्राष्ट्रिय क्रिकेट मैदानमा प्रतियोगिताका सबै खेलहरू सञ्चालन हुनेछन्। प्रतियोगिताका खेलहरू आईसीसीको आधिकारिक प्लेटफर्म ICC.tv मार्फत प्रत्यक्ष प्रसारण गरिनेछ।
प्रतियोगिताका लागि सहभागी १० टोलीलाई दुई समूहमा विभाजन गरिएको छ। समूह ‘ए’ मा बंगलादेश, आयरल्यान्ड, नामिबिया, पपुवा न्युगिनी र संयुक्त राज्य अमेरिका रहेका छन् भने समूह ‘बी’ मा आयोजक नेपालसहित नेदरल्यान्ड्स, स्कटल्यान्ड, थाइल्यान्ड र जिम्बाब्वे रहेका छन्। समूह चरणका खेलहरू जनवरी १८ देखि २६ सम्म एक दिनको अन्तरालमा खेलाइनेछन्।
समूह चरणपछि दुवै समूहका शीर्ष तीन टोली सुपर सिक्स चरणमा प्रवेश गर्नेछन्। जनवरी २८ बाट सुरु हुने सुपर सिक्स चरणबाट उत्कृष्ट चार टोलीले आईसीसी महिला टी–२० विश्वकप २०२६ का लागि स्थान सुरक्षित गर्नेछन्।
यस छनोट प्रतियोगितामा अनुभवी र नयाँ टोलीको रोचक मिश्रण देखिनेछ। बंगलादेश, आयरल्यान्ड, स्कटल्यान्ड र थाइल्यान्ड यसअघि नै महिला टी–२० विश्वकप खेलिसकेका टोली हुन् भने नेपालसहित अन्य छ टोली पहिलो पटक विश्वकपमा छनोट हुने लक्ष्यसहित मैदान उत्रँदैछन्।
प्रतियोगिताअघि भएका अभ्यास खेलहरूमा थुप्रै खेलाडीले प्रभावशाली प्रदर्शन गरेका छन्। पपुवा न्युगिनीकी कोनियो ओआलाले जिम्बाब्वेविरुद्ध ५२ बलमा ७१ रन बनाउँदै सात छक्का प्रहार गरेकी थिइन्। आयरल्यान्डकी ओर्ला प्रेन्डरगास्टले नेपाल र जिम्बाब्वेविरुद्ध लगातार दुई अर्धशतक बनाएकी छन् भने ग्याबी लुइसले ३८ बलमा ७७ रनको विस्फोटक पारी खेलेकी थिइन्।
नेदरल्यान्ड्सकी हेथर सिगर्सले नामिबियाविरुद्ध ३९ बलमा ८६ रन बनाउँदै बलिङतर्फ पनि तीन विकेट लिएकी थिइन्। नामिबियाकी यास्मिन खान पनि अभ्यास खेलमा लगातार अर्धशतकसहित राम्रो लयमा देखिएकी छन्।
बंगलादेश टोलीमा कप्तान निगार सुल्ताना जोटी र शरमिन अख्तरजस्ता अनुभवी खेलाडी रहेका छन्, जो आईसीसी महिला क्रिकेट विश्वकप २०२५ छनोटको ‘टिम अफ द टुर्नामेन्ट’ मा समावेश भएका थिए। स्कटल्यान्डकी क्याथ्रिन ब्राइस र क्याथ्रिन फ्रेजर पनि प्रतियोगिताका प्रमुख खेलाडीमध्ये पर्छन्।
यस प्रतियोगिताले युवा प्रतिभालाई पनि अन्तर्राष्ट्रिय मञ्च प्रदान गर्नेछ। अमेरिकाकी १७ वर्षीया चेतना पग्यड्यालाले अभ्यास खेलमा नेपालविरुद्ध अविजित ५६ रन बनाएकी छन् भने जिम्बाब्वेकी १७ वर्षीया बिलभ्ड बिजा र थाइल्यान्डकी १८ वर्षीया अफिसारा सुवान्चोनरथी पनि ध्यान आकर्षित गर्ने खेलाडी हुन्।
नेपालमा आयोजना हुन लागेको यस अन्तर्राष्ट्रिय छनोट प्रतियोगिताले नेपाली महिला क्रिकेटको विकास र अन्तर्राष्ट्रिय पहिचानलाई थप मजबुत बनाउने विश्वास लिइएको छ।
