एन्फा वरिष्ठ उपाध्यक्ष निलम्बनमा
काठमाडौं । अखिल नेपाल फुटबल संघ एन्फाका वरिष्ठ उपाध्यक्ष वीरबहादुर खड्का निलम्बनका परेका छन् ।
अधिकार भन्दा बाहिर गएर महासचिव किरण राईलाई कारबाही गरेको भन्दै खड्का निलम्बनमा परेका हुन्।
एन्फाको शुक्रवार बसेको आपत्कालीन भिडियो कन्फेरेन्स बैठकबाट वरिष्ठ उपाध्यक्ष खड्कालाई निलम्बन गर्ने निर्णय गरिएको प्रवक्ता सुरेश शाहद्वारा प्रेस नोटमा उल्लेख छ।
संघको विधानमा कुनै वैधानिक अधिकार नभएको तर संघको लेटर हेड, छाप, चलानी नम्बर दुरुपयोग गरेको भन्दै खड्कालाई निलम्बन गरिएको प्रेस नोटमा भनिएको छ।
खड्काले गम्भीर अनुशासन उल्लङ्घन गरेको र संघको वरिष्ठ उपाध्यक्षको गरीमा र मर्यादा कायम नगरी संघ र नेपाली फुटबल खेलको विकासमा आघात पुर्याउने कार्य गरेको एन्फाको ठहर छ ।
खड्कालाई विधानको धारा ३८ को १४ बमोजिम आगामी साधारण सभा सम्मको लागि निलम्बन गरिएको बताइएको छ।
अध्यक्ष पंकज नेम्बाङ विदेश भएको समयमा वरिष्ठ उपाध्यक्ष खड्काले महासचिव किरण राईलाई निलम्बन गरेको भन्दै कार्यवाहक अध्यक्षको रूपमा विज्ञप्ति जारी गरेका थिए ।
