कानुनमा नभएका शिक्षाका विषय नियमावलीमा व्यवस्थापन गरौँ : मन्त्री पन्त 

काठमाडौं । शिक्षामन्त्री रघुजी पन्तले कानुनमा नभएका कुराहरूलाई नियमावलीमा व्यवस्थापन गरेर अगाडि बढ्न प्रस्ताव गरेका छन् । 

सोमबार बसेको प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा भएको विद्यालय शिक्षा विधेयक,२०८० सम्बन्धी समितिको प्रतिवेदन माथि छलफलमा बोल्दै उनले कानुनमा नभएका कुराहरूलाई नियमावलीमा व्यवस्थापन गर्न सकिन्छ भने नियमावलीमा नै व्यवस्थापन गरेर जान प्रस्ताव गरे । 

त्यस्तै मन्त्री पन्तले निजी विद्यालयहरूलाई कानुन नियमहरूमार्फत कडाइकासाथ नियमन गर्नुपर्ने पनि धारणा राखे । 

उनले भने,‘निजी विद्यालयहरूलाई नियमन गर्ने कुरामा सरकार प्रष्ट छ । प्रष्टतासाथ हाम्रा रुलिङहरू, कानुन, नियमहरूमार्फत कडाइकासाथ नियमन गर्नुपर्छ । नियमन गर्नुपर्छ र ट्र्याकमा ल्याउनुपर्छ भन्नुको तात्पर्य उनीहरूलाई अगाडि बढ्नै नसक्ने गरी गर्नुहुँदैन । कानुनमा नभएका कुराहरूलाई नियमावलीमा व्यवस्थापन गर्न सकिन्छ भने नियमावलीमा नै व्यवस्थापन गरौँ ।’

त्यस्तै उनले कानुन बनाउँदै गर्दा व्यवहारमा लागू हुनसक्ने सम्भावना कति छ त्यसलाई हेर्नुपर्ने बताए । सरकारको दायित्व अनिवार्य निःशुल्क छात्रवृत्ति कार्यान्वयन गर्ने रहेको बताउँदै उनले सरकार त्यो कार्यान्वयन गर्न प्रतिबद्ध रहेको पनि बताए । 

कानुन बनाउँदै गर्दा त्यसलाई व्यवहारमा लागू हुनसक्ने सम्भावना कति छ त्यसलाई हेर्नुपर्छ । प्रगतिशील र अगाडि बढ्न सक्नेखालको पनि हुनुपर्छ । हाम्रो संविधानले तीन खम्बे नीति लिएको छ । सँगसँगै शिक्षा नीति तथा ऐन बनाउँदा प्रष्ट रुपमा १२ कक्षासम्मको निःशुल्क र अनिवार्य पनि भनेका छौँ । तर यथार्थ के हो भने गुठीले चुनेका विद्यालयहरू पनि छन् । सार्वजनिक, सामुदायिक, निजी पनि छन् ।

कानुनले यी तीनै वटा विद्यालयलाई र भूमिकालाई यथोचित सम्मान गरेको छ । उनीहरूलाई पनि विकासको बाटोमा अगाडि बढ्ने सम्भावना खोलिदिनुपर्ने छ । सरकारको दायित्व अनिवार्य निःशुल्क छात्रवृत्ति कार्यान्वयन गर्ने नै हो । वर्तमान सरकार त्यो कार्यान्वयन गर्न प्रतिबद्ध छ,’उनले भने  विधेयकलाई लम्ब्याउने भन्दा पनि कसरी हुन्छ चाँडो टुङ्गो लगाउन सबै जना लागिपर्नुपर्ने उनको भनाई छ ।