आतङ्कवादी हमला भए कडा प्रतिकार गर्ने मोदीको चेतावनी
काठमाडौं । भारतीय प्रधानमन्त्री नरेन्द्र मोदीले भारतविरुद्ध हुने कुनै पनि आतङ्कवादी हमलाको कडा प्रतिकार गरिने बताएका छन् । पाकिस्तानसँग चार दिने सैन्य टकराब अन्त्य भएपछि राष्ट्रका नाममा सोमबार राति सम्बोधन गर्दै उनले यस्तो चेतावनी दिएका हुन् ।
भारत र पाकिस्तानबीच चार दिनसम्म चलेको हवाई आक्रमण र प्रत्याक्रमणको श्रृखंला र दुवै पक्षबिच सीमापार भारी गोलाबारीपछि पहिलो पटक जनतालाई सम्बोधन गर्दै मोदीले भने, ‘यो युद्धको युग होइन । तर, यो आतङ्कको युग पनि होइन ।’
भारत नियन्त्रित कश्मीरमा आतङ्ककारी हमलामा २६ जना पर्यटकको हत्यामा भारतले पाकिस्तानको हात रहेको बताएको थियो । पाकिस्तानले यसलाई खारेज गर्दै आएको छ ।
परमाणु हतियार भएका यी दुई छिमेकी देशबिच अमेरिकाको मध्यस्थतामा शनिबार युद्धविराम गर्ने सहमति भएको थियो । सो सहमति अहिलेसम्म कायम रहेको छ । दुवै राष्ट्रले सतर्क रहने बताएका छन् ।
सम्बोधनमा मोदीले भने, ‘यदि, भारतमा फेरि आतङ्कवादी हमला भएमा कडा प्रतिकार गरिनेछ । आतङ्क र व्यापारको विषयमा सौदाबाजी हुन सक्दैन ।’
मोदीको यो टिप्पणी युद्ध नरोके भारत–पाकिस्तानसँग अमेरिकाले व्यापारिक कारोबार बन्द गर्ने बताएपछि दुई देशहरू युद्धविराम गर्न सहमत भएको भन्ने अमेरिकी राष्ट्रपति डोनाल्ड ट्रम्पको भनाइतर्फ इङ्गित थियो ।
